Qazaqstanda eń tómengi jalaqyny aıqyndaý tásilderi halyqaralyq deńgeıde bekitiledi, - dep habarlaıdy Aqshamnews.kz tilshisi.
Májilis damýshy elderdi erekshe eskerip, eń tómen jalaqyny belgileý týraly konvensıany (№131 konvensıa) ratıfıkasıalady.
№131 konvensıany ratıfıkasıalaý ne beredi?
- Qazaqstannyń eń tómengi jalaqyny aıqyndaıtyn qoldanystaǵy tásilderin halyqaralyq deńgeıde bekitedi;
- Qazaqstannyń Halyqaralyq eńbek uıymyna músheligi aıasynda halyqaralyq mindettemelerge adaldyǵyn rastaýǵa múmkindik beredi.
Qujatta mynadaı jalpy prınsıpter aıqyndalady:
- eń tómengi jalaqy júıesin engizý;
- áleýmettik áriptestik taraptarynyń eń tómengi jalaqyny belgileýge jáne qaıta qaraýǵa qatysýy;
- eń tómengi jalaqyny anyqtaý kezinde ekonomıkalyq faktorlar men jumysshylardyń qajettilikterin esepke alý;
- eńbekaqy salasyndaǵy kemsitýshilikke tyıym salý.
Qazaqstan 1993 jyldan bastap Halyqaralyq eńbek uıymynyń tolyqqandy múshesi jáne uıym erejelerin saqtaý men halyqaralyq eńbek standarttaryn ulttyq zańnamaǵa kezeń-kezeńimen engizý boıynsha mindettemelerdi moınyna aldy.
Buǵan deıin Qazaqstan eńbek jaǵdaılary, eńbekti qorǵaý, áleýmettik qorǵaý jáne áleýmettik dıalogtyń negizgi máselelerin qamtıtyn eńbek salasyndaǵy uıymnyń 28 konvensıasyn ratıfıkasıalady.
Qazir eń tómengi jalaqyny belgileý týraly konvensıany (131-konvensıa) Halyqaralyq eńbek uıymyna múshe 54 memleket ratıfıkasıalady. Olardyń qatarynda Táýelsiz Memleketter Dostastyǵynan Armenıa men Ázerbaıjan bar.