Qazaqstandyq áýe kompanıalary Eýroodaqtyń qara tizimine kirmedi
Qazaqstanda ushý qaýipsizdigi joǵary deńgeıde. Halyqaralyq azamattyq avıasıa uıymynyń mamandary ony 84% baǵalady. Bul álemdegi ortasha kórsetkishten 15% joǵary, dep habarlaıdy Almaty-akshamy.kz
«Pandemıa óz túzetýlerin engizdi. Biraq qazir shekteýler birtindep jeńildep jatyr. Qazaqstan arqyly ótetin jańa baǵyttardyń damıtynyna senemiz», - deıdi QR IIDM Azamattyq avıasıa komıtetiniń tóraǵasy Talǵat Lastaev.
Eske sala keteıik, qazaqstandyq áýe kompanıalary Eýroodaqtyń qara tiziminde joq. Elimizdegi ushý qaýipsizdigi deńgeıiniń odan ári artýyna Eýrokomıssıanyń mobıldik jáne kólik departamenti arasyndaǵy yntymaqtastyǵy óz septigin tıgizdi.
«Arnaıy azamattyq ákimshilik qurylyp, birneshe jyl ishinde jaqsy nátıje kórsete aldy. Eýrokomıssıa músheleri oń baǵasyn berip otyr. Byltyr Eýropa azamattyq avıasıa konferensıasynyń múshesi atandyq. Soǵan sáıkes, Eýroodaq qazaqstandyq avıakompanıalarǵa shekteý sharalaryn qoldanbaýy tıis», - deıdi QR IIDM Azamattyq avıasıa komıtetiniń tóraǵasy Talǵat Lastaev.
Azamattyq avıasıa komıteti tóraǵasynyń aıtýynsha, elimizdiń 12 áýejaıynda «ashyq aspan tártibin» engizý kerek. Áýe aılaqtary tek tikeleı reısterge ǵana emes, máselen, Japonıa nemese Ońtústik-SHyǵys Azıaǵa Qazaqstan arqyly ótetin tranzıttik saparlar úshin de jaramdy bolýy tıis. Iaǵnı ushý qaýipsizdiginiń joǵary standarttaryna saı bolý kerek. Al ol úshin eýropalyq seriktestermen tájirıbe almasý óz septigin tıgizeri sózsiz.