Geologıa salasyna tyń serpin berilip jatyr
Qazaqstanda ulttyq geologıalyq qyzmet qurylyp, ınvestorlardyń sapaly geologıalyq aqparatqa qoljetimdiligin qamtamasyz etý qajet. QR Prezıdenti Qasym-Jomart Toqaev Qazaqstan halqyna kezekti Joldaýynda osylaı málim etti, dep habarlaıdy Almaty-akshamy.kz. Qazaqtv.com saıtyna silteme jasap.
«Baǵynysty uıymdardyń bazasynda qurylatyn jańa mekeme jer qoınaýyna kimdi jáne qalaı jiberý kerektigin sheshetin monopolıs bolmaýy kerek. Onyń róli ınvestorlardy keshendi servıstik qoldaýǵa baǵyttalǵany jón», - dedi Memleket basshysy.
Prezıdent Qasym-Jomart Toqaev atap kórsetkendeı, qazir ázirlenip jatqan ónerkásiptik saıasat týraly zań qaıta óńdeý salasynyń aldynda turǵan suraqtarǵa jaýap berýi tıis. Onyń erejesi qarapaıym jáne túsinikti: otandyq ónerkásip úshin shıkizat taýarlarynyń baǵasy qoljetimdi, kólemi jetkilikti bolýy qajet.
«Elimizdiń resýrstyq áleýeti tolyq ashylmaǵanyn, geologıalyq turǵydan zerdelený deńgeıi tómen ekenin qaperden shyǵarmaǵan jón. Sapaly geologıalyq aqparattyń ınvestorlarǵa qoljetimdiligin arttyrý qajet. Jer qoınaýyn paıdalaný salasyna, ásirese geologıalyq barlaý jáne jer qoınaýyn keshendi zertteý isine tyń serpin qajet. Ult jospary aıasynda bastalǵan reformalardy sońyna deıin jetkizgen jón. Atap aıtqanda, geologıalyq aqparattyń ashyq sıfrlyq málimetter bazasyn quryp, ony ınvestorlar úshin qoljetimdi etý kerek. Jer qoınaýy – ulttyń baılyǵy», - dedi Prezıdent.