Óndiris kólemi 7,6 paıyzǵa artqan.
2022 jyldyń alǵashqy jartyjyldyǵynyń qorytyndysy boıynsha, elimizdegi óńdeý ónerkásibi salasynda oń úrdis baıqalýda. Atap aıtqanda, bıyl tústi metalýrgıa óndirisiniń kólemi 7,6 paıyzǵa artqan, dep habarlaıdy Almaty-akshamy.kz.
Mamandardyń aıtýynsha, rafınadtalǵan mys, altyn quımalary, kúmis túıirshikteri, tazartylǵan altyn men kúmis, rafınadtalǵan qorǵasyn jáne katodty mys óndirý kólemi ósken.
«Kóptegen kásiporyndarda ónerkásipti modernızasıalaý boıynsha jumystar júrgizilip, jańa jobalar iske qosylýda. Máselen, «Altynalmas AK» AQ kompanıasy Jambyl oblysyndaǵy «Aqbaqaı» altyn ken ornynyń óndiristik alańdarynda modernızasıa júzege asyrýda. Osyǵan oraı ken barlaý jumystarynda paıdalanylatyn qural-jabdyqtar jańartylyp, dıirmen qurylysy aıaqtaldy jáne qajetti tehnıkalar satyp alyndy. Sondaı-aq «Sıfrlyq ken orny» jobasyn óndiriske engizý aıasynda SCADA qashyqtan basqarý baǵdarlamasy qoldanylmaq», - delingen Indýstrıa jáne ınfraqurylymdyq damý mınıstrliginiń baspasóz qyzmetiniń habarlamasynda.
Sonymen qatar Faza-2 altyn alý fabrıkasyn iske qosý da kózdelip otyr. Atalǵan kásiporyn altyn rýdalaryn qaıta óńdeýdi jylyna 1,2 mln tonnaǵa deıin arttyrýǵa múmkindik bermek. Sáıkesinshe, jylyna altyn óndirisi kólemi 13 paıyzǵa artpaq.
Sondaı-aq «Altynalmas» kompanıasy qorshaǵan ortany qorǵaýǵa da óz úlesin qosýda. Kásiporyn balamaly qýat kózderi arqyly parnıktik gazdar shyǵaryndylaryn azaıtyp, aýaǵa bólinetin kómirqyshqyl gazynyń mólsherin azaıtýda. Kásiporynǵa tıesili Qaraǵandy oblysyndaǵy ken oryndarynda kún sáýlesi arqyly qýat alatyn arnaıy baǵandar ornatyldy. Olar bir-birinen jarty shaqyrym qashyqtyqta ornalasqan. Jalpy aýmaǵy 10,85 shaqyrymdy quraıdy.