Barlyq bastaýysh synyp oqýshylary tegin ystyq tamaqpen qamtylady.
Áleýmettik osal toptan shyqqan, qıyn jaǵdaıdaǵy otbasylardyń balalary balabaqshalarda tegin tamaqpen qamtamasyz etiledi. Bul týraly Oqý-aǵartý mınıstri Asqat Aımaǵambetov áleýmettik jelidegi paraqshasynda jazdy, dep habarlaıdy Almaty-akshamy.kz.
«Qarjylaı qıyndyqqa ushyraǵan otbasylar ózderiniń balalaryn, qarajattyń jetispeýshiligine baılanysty, kezekke de qoımaıdy, sáıkesinshe, olar balabaqshaǵa da barmaıdy. Nátıjesinde bul balalardyń áleýmettenýi jetkiliksiz bolady, mekteptegi úlgerimi tómen táýekel tobyna túsýi boıynsha táýekelder kóp. Sondaı-aq, balalar durys tamaqtanbaǵandyqtan, olardyń densaýlyǵynda da problemalar týyndaıdy», - deıdi mınıstr.
Prezıdenttiń saılaýaldy baǵdarlamasynda kórsetilgen birneshe tarmaqqa toqtalyp ótken vedomstvo basshysy bul máseleniń qalaı sheshiletinin málim etti.
«Bul máseleni sheshý úshin endi Prezıdenttiń baǵdarlamasyna sáıkes, Otbasynyń sıfrly kartasy arqyly qıyn jaǵdaıǵa ushyraǵan, áleýmettik osal otbasylardan shyqqan balalardy anyqtaý algorıtmi engizilip, olar balabaqshalarda tegin tamaqpen qamtamasyz etiledi. Prezıdenttiń bul ıgi bastamasy birneshe júz myń balaǵa balabaqshaǵa barýǵa, olardy áleýmettendirýge, densaýlyǵyn jaqsartýǵa, bolashaqta oqý úlgerimin joǵarylatýǵa múmkindik beredi», - dep jazdy ol.
Sondaı-aq, mınıstrdiń aıtýynsha barlyq bastaýysh synyp oqýshylary tegin ystyq tamaqpen qamtylady.
«Búgingi tańda 7 oblysta 1-4-synyptardyń oqýshysyna tegin ystyq tamaq beriledi. Endi Memleket basshysynyń 2029 jylǵa deıingi saılaýaldy baǵdarlamasy aıasynda 1-4-synyp oqýshylaryn 100% mektep tamaǵymen qamtý josparlanyp otyr. Prezıdenttiń bul bastamasy óz kezeginde balalardyń densaýlyǵyna, jaqsy damýyna, oqý úlgerimin jáne ál-aýqatyn jaqsartýyna oń áser etetini sózsiz. Kóptegen zertteý osyndaı sheshimderdiń paıdaly ekenin kórsetip otyr», - deıdi Asqat Aımaǵambetov.