Elimizde qant dıabetine shaldyqqan azamattardyń ómir sapasyn jaqsartý maqsatynda keshendi sharalar júrgizilýde.
Qoǵam densaýlyǵyna eleýli áser etetin bul aýrýdy erte anyqtaý, durys emdeý jáne aldyn alý úshin memleket tarapynan tegin medısınalyq kómekti keńeıtý, dıabet mektepteriniń qyzmetin kúsheıtý jáne halyq arasynda turaqty skrınıng ótkizý sharalary qolǵa alynýda, dep habarlaıdy aqshamnews.kz.
Bul týraly Óńirlik komýnıkasıalar qyzmetiniń baspasóz brıfıńinde Qazaqstan Respýblıkasynyń Dıabet qaýymdastyǵynyń (QRDQ) prezıdenti Baıan Jýmanova málimdedi.
Búgingi kúni memleketimizde 500 myńnan astam adam qant dıabetimen tirkelgen, olardyń 10%-y 1-shi tıpti, al 90%-y 2-shi tıpti dıabetke shaldyqqan. Naýqastarǵa durys tamaqtaný, qandaǵy qant deńgeıin turaqty baqylaý jáne salaýatty ómir saltyn ustaný qajettigin túsindirý maqsatynda elimizde arnaıy dıabet mektepteri jumys isteıdi.
«Dıabet mektebinde pasıentterge kómirsýlardy esepteý, nandyq birlik (HE) qoldaný, ınsýlın mólsherin durys anyqtaý jáne fızıkalyq belsendilikti saqtaý daǵdylary úıretiledi. Bul olardyń aýrýyn tıimdi basqarýǵa jáne ómir sapasyn arttyrýǵa kómektesedi», – dedi Baıan Jýmanova.
Dıabetpen aýyratyn azamattardy tegin dári-dármekpen qamtamasyz etý jáne medısınalyq kómek kólemin ulǵaıtý maqsatynda memleket jańa sharalardy engizýde.
«Elimizde 1-shi tıpti dıabetpen aýyratyn barlyq azamattar ınsýlınmen tolyqtaı tegin qamtamasyz etiledi. Qosymsha qandaǵy qant deńgeıin ólsheıtin qurylǵylar men test jolaqtary da tegin beriledi. 2-shi tıpti dıabetke shaldyqqandar úshin de tegin dári-dármek qarastyrylǵan, biraq olar sırek qant ólsheıtindikten, test jolaqtarynyń sany shekteýli bolady», – dep atap ótti Baıan Jýmanova.
2024 jyly dıabetke qarsy skrınıngtik tekserýler men bilim berý baǵdarlamalary keńeıtildi. Respýblıka óńirlerinde endokrınologtar men jalpy tájirıbe dárigerlerine dıabetti emdeý boıynsha oqý semınarlary ótkizildi.
Dıabetti erte kezeńde anyqtaý asa mańyzdy, sebebi bul aýrýdyń asqyný qaýpin tómendetýge kómektesedi. Osyǵan baılanysty Qazaqstanda árbir azamattyń jylyna bir ret qandaǵy qant deńgeıin tegin tekserý múmkindigi qarastyryldy.
2024 jyldyń basynan beri elimizde 492 000 azamat qant dıabeti dıagnozymen tirkelgen. Halyq arasynda dıabetti erte anyqtaý sharalarynyń kúsheıtilýine baılanysty aýrýdy erte aýyzdyqtaýǵa múmkindik týyp otyr.
«Dıabettiń aldyn alý úshin onyń erte anyqtalýy óte mańyzdy. Sondyqtan biz skrınıngtik baǵdarlamalar arqyly halyqty ýaqytyly tekserýge shaqyramyz. Árbir 35 jastan asqan azamat jylyna bir ret qandaǵy qant deńgeıin tekserýi qajet», – dep málimdedi Baıan Jýmanova.