Qazaqstan 2029 jylǵa deıin qatty turmystyq qaldyqtardy qaıta óńdeý deńgeıin 40%-ǵa deıin jetkizýdi kózdep otyr. Bul týraly QR Ekologıa jáne tabıǵı resýrstar mınıstri Erlan Nysanbaev málimdedi, dep habarlaıdy Aqshamnews.kz
Mınıstrdiń aıtýynsha, búginde osy maqsatta jalpy quny 345 mlrd teńgege baǵalanatyn 67 joba ázirlenip jatyr. Onyń ishinde 14 jobaǵa 52 mlrd teńge kóleminde qarjy bólingen. Bul bastamalar qatty qaldyqtardy tıimdi basqarýǵa, qorshaǵan ortaǵa zıandy azaıtýǵa jáne elimizdiń ekologıalyq qaýipsizdigin arttyrýǵa baǵyttalǵan.
Jobalardyń 41-i tikeleı qaıta óńdeý salasyna arnalsa, basty nazar qaǵaz, plasık jáne áınek qaldyqtaryna bólinip otyr. Sebebi, elimizde osy úsh materıal qaldyqtarynyń kólemi óte joǵary. Qazirgi ýaqytta elimizde qaldyqtardy qaıta óńdeý deńgeıi 25,8% shamasynda. 2029 jylǵa deıin bul kórsetkishti keminde 40%-ǵa deıin arttyrý josparda bar.
Jobalar aıasynda jańa óńdeý kásiporyndaryn iske qosý, bar ınfraqurylymdy jańartý jáne qaldyqtardy jınaý men suryptaý júıesin jetildirý kózdelýde. Mınıstrdiń sózinshe, jyl sońyna deıin barlyq 67 joba júzege asyryla bastaıdy.
Baspasóz máslıhatynda jýrnalıser tarapynan tekstıl qaldyqtaryn qaıta óńdeý máselesi de kóterildi. Mınıstr Erlan Nysanbaev qazirgi tańda bul baǵytqa qatysty jobalar Ekologıalyq kodekstiń 388-baby sheńberinde memlekettik qoldaýǵa jatpaıtynyn atap ótti. Sebebi, tekstıl qaldyqtarynyń jalpy kólemi áli de az deńgeıde.
Alaıda, bul másele de bolashaqta nazardan tys qalmaıdy. Mysaly, Almaty qalasynda jylyna 100 tonna tekstıl qaldyǵyn óńdeıtin iri kásiporyn jumys istep tur. Halyqtyń tutyný deńgeıi artqan saıyn tekstıl qaldyqtarynyń kólemi de ulǵaıyp keledi. Sondyqtan bul baǵytta júıeli saıasat pen uzaqmerzimdi sheshimder qajet bolatyny sózsiz.
Mınıstrlik qazirgi ýaqytta qaldyqtardy basqarý strategıasyn ázirlep jatyr. Qujat tamyz aıynyń sońyna deıin ázirlenip, qoǵam ókilderimen talqylaýǵa usynylady dep josparlanyp otyr. Bul – ashyqtyqty qamtamasyz etý jáne sarapshylar men azamattyq qoǵamnyń usynystaryn eskere otyryp, ekologıalyq saıasatty tıimdi qalyptastyrýǵa múmkindik beredi.
Qazaqstannyń qaldyqtardy basqarý strategıasy naqty josparlarmen jáne aýqymdy jobalarmen bekip otyr. Ekologıa jáne tabıǵı resýrstar mınıstrligi qolǵa alyp jatqan 67 jobanyń tolyq iske asýy elimizdi ekologıalyq qaýipsizdik pen turaqty damý jolyna bastaıdy. Qaldyqtardy qaıta óńdeý úlesiniń 40%-ǵa jetýi – tek ekologıa úshin emes, ekonomıkanyń jańa sektoryn damytý úshin de mańyzdy qadam bolmaq.