1 tamyzdan bastap elímízde auyl sharuashylyǵynyń sanaǵy ótpek
Qazaqstanda ūlttyq auyl sharuashylyǵy sanaǵy ótedí. Onyń bírínshí kezeńí 1-31 tamyz aralyǵynda onlaın rejımde ótíp, ekínshí kezeńí 20 qyrkúıekte bastalmaq. Óńírlík kommunıkatsıyalar qyzmetínde Strategıyalyq josparlau jáne reformalar agenttígí Ūlttyq statıstıka byurosy departamentíníń basshysy Darhan Isaev sanaqtyń Almatyda qalaı ótkelí jatqanyn aıtty.
Sanaq – auyl sharuashylyǵy salasyn baǵalauǵa múmkíndík beretín, onyń jaı-kúıí turaly naqty aqparat alatyn úlken zertteu. Ol BŪŪ Azyq-túlík jáne auyl sharuashylyǵy ūıymynyń 10-shy álemdík auyl sharuashylyǵy sanaǵyn júrgízu baǵdarlamasynyń ayasynda qolǵa alyndy. Yaǵnı, halyqaralyq standartqa saı ótíp, tsıfrlyq tehnologıyalar qoldanylady.
«Almaty agrarlyq aımaqtyń qataryna jatpasa da, qalada auyl sharuashylyǵyna qatysy bar 1000-nan astam kásíporyn men shamamen 2400 jeke sharuashylyq, fermerlík qojalyqtar, sondaı-aq ósímdík sharuashylyǵymen, mal sharuashylyǵymen, balyq sharuashylyǵymen resmı túrde aınalysatyn jeke kásípkerler tírkelgen. Olardyń kóbí qalanyń mańynda, kórshí oblystarda jūmys ístegenímen, Almaty qalasynda tírkelgenderí osy sanaqqa qatysady», - dep tolyqtyrdy Darhan Isaev.
Darhan Isaevtyń aıtuynsha, Almatydaǵy barlyq nysan onlaın formatta sanaqqa qatysuy tıís. 28 shíldeden bastap 1414 nómírínen SMS-habarlama kelíp, olardy sanaq.gov.kz portalynda sanaqqa qatysuǵa shaqyra bastaıdy.
Portalǵa tírkeluge ETsP, SMS nemese eGovMobile qosymshasyndaǵy QR-kodty qoldanyp, oǵan kírgen soń 2-SHP/KFH anketasyn toltyrady. Būl anketa jerdí paıdalanu turaly aqparatty, tehnıkalyq qūraldy, ınfraqūrylymdy, mal basyn, ónímdí óndíru men ótkízuge baılanysty búkíl málímettí qamtymaq.
Saıtqa kírgen adamǵa jón síltep otyratyn nūsqaulyq ta, táulík boıy jūmys ísteıtín SANAQ myrza deıtín chat-bot ta bar. Anketanyń toltyrylǵan bólígín saqtap, qalǵanyn keıín asyqpaı toltyrsańyz da bolady.
Sanaqqa qatysatyn adamnyń ınternetí bolmaı, kompyuterge qoly jetpeı jatsa, statıstıka departamentínde, veterınarlyq qyzmet pen audan ákímdíkterínde qyzmet kórsetetín arnauly punktter de bar. Qalada qajettí tehnıkamen jabdyqtalǵan osyndaı bes punkt jūmys ísteıdí.
Spıker barlyq anketada kórsetílgen aqparattyń qūpıya saqtalatynyn jáne «Memlekettík statıstıka turaly» Zańmen qorǵalǵanyn atap óttí. Aqparatty salyq organdaryna, polıtsıyaǵa nemese basqa da memlekettík qūrylymdarǵa bermeıdí, statıstıkalyq taldauǵa ǵana paıdalanady. Barlyq sūqbatshylar málímettí jarıyalamaıtyny turaly míndetteme alady, aqparatty saqtau júıesíníń ózí aqparattyq qauípsízdík talaptaryna saı jūmys ísteıdí.
Shūǵyl qoldau kórsetu úshín tamyz aıynda 1446 nómírí boıynsha bíryńǵaı baılanys ortalyǵy da jūmys ísteıdí, sanaqtyń arnauly jelísí de ashylǵan.
Sanaqtyń aldyn ala shyqqan alǵashqy qorytyndysy 2025 jyldyń jeltoqsanynda jarıyalanyp, túpkílíktí qorytyndy 2026 jyly bír-aq shyǵady. Būl málímetter auyl sharuashylyǵynyń jaǵdaıyn taldap, memlekettík qoldau kórsetíp, ınfraqūrylym salyp, ónímdí saqtau men óńdeudí josparlauǵa, sondaı-aq osy salaǵa subsıdıya bóluge negíz bolmaq.
«Almaty qalasynyń barlyq auyl sharuashylyǵy nysandaryn sanaqqa qatysuǵa shaqyramyn. Būl kóp uaqyt almaıdy, bíraq síz sanaqqa qatysu arqyly osy salanyń damuyna atsalysasyz», - dep qosty Darhan Isaev.