Almatyda jastar jumysqa ornalasyp, ózin-ózi damytyp, bos ýaqytyn tıimdi ótkizetindeı etip damytyp jatyr ınfraqurylymdy. Stýdenttik jataqhanalarmen birge, endi jas jetkinshekterge arnalǵan Komúnıtı-ortalyqtardy salýǵa da kóńil bóle bastady. Jaqynda ótken baqylaýdyń qorytyndysyna qaraǵanda, bular jastardy naqty qoldaıtyn alańǵa aınalypty. Óńirlik komýnıkasıalar qyzmetinde qoǵamdyq keńes múshesi ári baqylaý tobynyń jetekshisi Rýstam Qaıryev osylaı dep aıtty.
2025 jyldyń 20 maýsymynan 5 shildesine deıin Qoǵamdyq keńestiń №5 komısıasy qoǵamdyq damý, mádenıet, sport, din men jastar salasynda monıtorıń júrgizdi. Tekserýge keńes músheleri men jastar uıymynyń ókilderi qatysyp, olar barlyq aýdandaǵy 9 ortalyqqa baryp, jumystyń tıimdiligin baǵalaý úshin zertteý júrgizip qaıtqan bolatyn. Bul ortalyqtardyń maqsaty - jastardyń jumysqa ornalasyp, damýyna jaǵdaı jasap, ınfraqurylymdy barynsha qoljetimdi ete túsý.
Qalalyq jastar saıasaty basqarmasy qoldaý kórsetetin Komúnıtı-ortalyqtar - jastardyń qyzmet barysynda ósip-ónýin qoldap, olardy oqytyp, psıhologıalyq kómek berip, shyǵarmashylyq jaǵynan shyńdaıtyn ashyq keńistikke aınaldy. Ár ortalyq kún saıyn 10:00-den 23:00-ge deıin jumys istep, jastardy tegin kýrstarǵa tartyp, kásibı keńes berip, olarǵa trenıńter, klýbtar, kovorkıngter men medıa aımaqtar usynady. Ortalyqtar Wi-Fi-men, prınterlermen, dybys jazý stýdıalarymen, asúımen tolyq jabdyqtalǵan. Bul olardyń jumys istep, demalýyna da yńǵaıly.
Jyl basynan beri ortalyqtar 375 000-nan astam jas turǵyndy qamtyǵan. Dáris, trenıń, týrnır, ekologıalyq aksıa men shyǵarmashylyq keshter sıaqty 1500-den astam is-shara ótkizdi. «Activity Boom» belsendilik kartasy boıynsha 972 adam tirkelgen. Jastar munda bal jınap, ony syılyqqa aıyrbastaı alady. Ortalyqtar Jasalmaty.kz, JobFair365 jáne SkillBridge sıaqty sıfrlyq platformalarǵa qosylǵan. Bul jastardyń ártúri is- sharaǵa qatysyp, jumys izdep, onlaın oqýyna da múmkindik bermek.
«NEET kategorıasyndaǵy jastarǵa, ıaǵnı jumys istemeıtin jáne oqymaıtyn jastarǵa erekshe nazar aýdaryldy. Tirkelgen 27 000 jastyń 2307-i oqýdan ótip, 1854-i jumysqa ornalassa, shamamen 600-i taǵylymdamadan ótip jatyr. 8000-nan astam adam ártúrli másele boıynsha keńes alyp, ony 2278-i psıhologtarmen keńesti. Sondaı-aq, jastardyń turǵyn úı baǵdarlamasy boıynsha «Otbasy bankpen» keńesip jatyrmyz», - dedi Rýstam Qaıryev.
Ortalyqtar ekologıalyq bastamalarǵa da úzbeı qatysady. «Eko-reındjerler» qozǵalysy men «Taza Qazaqstan» aksıasy arqyly qala jastary 40 000 túp aǵash egip, qaldyqtardy jınaý úshin fandomattar ornatyp, birneshe qoǵamdyq keńistikti qamqorlyǵyna alǵan.
«Komúnıtı-ortalyqtarda qazaq, aǵylshyn, káris, ıtalán tili, IT, dızaın, mobılografıa, anımasıa, sóıleý sheberligi men qarjy saýaty sıaqty tegin kýrstar da bar. Kitap klýbtary, otbasylyq kitaphanalar, TikTok mektebi, kınolar, akýstıkalyq keshter men shyǵarmashylyq sheberlik sabaqtary da jumys isteıdi. Ár ortalyq ózindik brend jobalardy júzege asyrady. Mysaly: «Men jas kezimde», «Tilder parki», «Job Teambuilding», «Esirtki jarnamasynyń ornyna mýral» jáne basqalary», - dep qosty Almaty qalasy Qoǵamdyq keńesiniń múshesi Dýman Qapasov.
«Monıtorıńtiń qorytyndysy bul ortalyqtardyń jastar arasynda suranysqa ıe ekenin kórsetti. Olar jumysqa ornalasýǵa, jańa daǵdylardy ıgerýge, pikirles, nıettes jandardy tabýǵa, ıdeıalardy júzege asyrýǵa jáne bos ýaqytyn jaıly ótkizýge kómektesedi. Qazir úsh aýdanda osyndaı eki ortalyqtan ashylǵan, jyldyń sońyna deıin taǵy birneshe ortalyq ashý josparlanyp otyr. Suranysty eskerip, alda ár aýdannan úsh ortalyqtan ashýdy usyndyq», - deıdi Qoǵamdyq keńestiń múshesi Marlen Rysbekov.
Sonymen qatar, baqylaý kezinde ınklúzıvti ınfraqurylymdy - pandýstardy, qońyraý batyrmalaryn, ájethanany áli de jaqsartý kerektigi anyqtaldy. Sondaı-aq, ýnıversıtettermen, mekteptermen, medısınalyq mekemelermen belsendi jumys istep, ortalyq týraly aqparatty taratyp, medıa men áleýmettik jelini paıdalanyp nasıhatty da kúsheıtýdi usyndy.
Komúnıtı-ortalyqtar qalanyń jastar saıasatynyń quramdas bóligine aınalyp, jan-jaqty damyǵan jańa urpaq qalyptastyrý úshin qolda bar múmkindikti paıdalanyp jatyr.