Almatyda pedagogıkalyq jáne ǵylymı qoǵamdastyq ókilderiniń qatysýymen respýblıkalyq ǵylymı-praktıkalyq konferensıa ótti.
İs-sharanyń negizgi taqyryby - bilim berýdiń barlyq deńgeılerinde pedagogıka salasyndaǵy zertteýlermen aınalysatyn pedagogıkalyq ǵylymdy damytý ortalyǵyn qurý, dep habarlaıdy aqshamnews.kz.
Oqý-aǵartý mınıstri Ǵanı Beısembaev sońǵy jyldary pedagogterdiń kásibı deńgeıin arttyrýǵa erekshe nazar aýdarylǵanyn atap ótti. Máselen, ótken jyly ǵylymı zertteýlermen aınalysatyn muǵalimderdiń úlesi 1,6 ese ósti, al pedagogter arasyndaǵy magıstrler sany rekordtyq 27,9 myń adamǵa jetti. Budan bólek, mınıstrlik pedagogter arasynan kadrlyq rezervti qalyptastyrýǵa baǵyttalǵan «Bilim berýdegi ózgeristerdiń 1000 kóshbasshysy» jobasyn iske asyrýdy jalǵastyrýda.
«Bilimniń sapaly bolýy ustazdyń myqtylyǵyna baılanysty. Bul bilim berý ınstıtýty pedagogıkalyq zertteýlerdi júıeli damytýǵa, muǵalimderdiń ǵylymı áleýetin kúsheıtýge jáne bolashaq mamandardy daıyndaý deńgeıin arttyrýǵa múmkindik bered», - dedi Ǵanı Beısembaev.
Konferensıa aıasynda mektepke deıingi, orta, tehnıkalyq jáne kásiptik, sondaı-aq joǵary jáne joǵary oqý ornynan keıingi bilim berýdiń ózekti máselelerine arnalǵan jumys seksıalary ótti. Óńirlerden kelgen ǵalymdar men pedagogter úshin onlaın-translásıa uıymdastyryldy.
İs-sharada Ál-Farabı atyndaǵy QazUÝ jáne Y.Altynsarın atyndaǵy Ulttyq bilim akademıasy arasyndaǵy yntymaqtastyq týraly Memorandýmǵa qol qoıyldy. Kelisim aıasynda pedagogıka salasyndaǵy ǵylymı zertteýler alańyna aınalatyn pedagogıka ǵylymyn damytý ortalyǵy qurylatyn bolady.