Fılm qalyń jurtshylyqtyń nazaryna bıyl 21 sáýirde usynylmaq
Otandyq kınotýyndynyń qatary taǵy bir fılmmen tolyqpaq. Bıyl sáýirde «Paralımpıes» fılmi jaryqqa shyǵady, dep habarlaıdy Almaty-akshamy.kz QazAqparatqa silteme jasap.
Shýchınskide «Paralımpıes» fılminiń jabyq kórsetilimi ótti. Aıtýly sharaǵa QR Mádenıet jáne sport mınıstri Dáýren Abaev qatysty.
«Parasportshylar týraly fılm túsirý ıdeıasy 2018 jyly Koreıada ótken paralımpıada oıyndarynan keıin keldi. Belgili bolǵandaı paralımpıadashylarǵa asa mán berilmeıtini baıqaldy. Paralımpıadashylardyń taǵdyry men sporttaǵy eńbekteri týraly qoǵamnyń habary az. Bul másele meni beı-jaı qaldyrmady. Fılm sújeti shynaıy ómirden alynǵan. Aldymen paralımpıadashylarmen keńesip, aqparat jınadyq. Motıvasıalyq fılm. Jalpy qazirgi otandyq fılmderdiń deni komedıa janryna jatady. Osy turǵyda biz ómirlik máni bar, adamdarǵa erik-jiger beretin týyndy jasaǵymyz keldi», - dedi fılm rejıseri Aldıar Baırakımov.
Onyń aıtýynsha, atalǵan fılmde birneshe kıno janrynan úzindi bar. Onyń ishinde drama, ekshn, komedıa jáne taǵy basqa.
«Parasportshylar óte jigerli adamdar. Ár parasportshynyń óz tarıhy bar. Fılmdi túsirý barysynda biz tikeleı kásibı paralımpıadashylarmen jumys istedik. «Paralımpıes» Qazaqstanda paralımpıadashylar týraly túsirilgen alǵashqy fılm. Taǵy bir jaıt, kópshilik úshin derekti fılm emes, kórkem týyndy etýge tyrystyq», - deıdi ol.
Fılmdegi basty róldi jas akter Asqar İlıasov somdaıdy. Túsirilim Almaty jáne Shýchınsk qalasyndaǵy qysqy sport nysandarynda ótti.
Al qalyń jurtshylyqtyń nazaryna bıyl 21 sáýirde usynylmaq.
«Jospar qurǵanda basty rólge ártis emes shynaıy parasportshyny túsirýdi oıladyq. Sóıtip 3 kastıng ótkizdik. Nátıjesinde kásibı ártistiń kerektigin túsindik. Sebebi basty róldi somdaý ońaı emes jáne parasportshyǵa qıynǵa soǵatyn boldy. Degenmen fılmniń ishinde naǵyz paralımpıadashylar da bar», - dedi fılm avtory.
Odan bólek, rejıser aldaǵy ýaqytta «Paralımpıes» fılmin kıno salasyndaǵy halyqaralyq baıqaýlarǵa qatystyryp, baǵyn synaıtynyn aıtty.