Shymkentte QR Mádenıet jáne aqparat mınıstrliginiń uıymdastyrýymen Ózbekstan Respýblıkasy arhıvteriniń kúnderi bastaldy.
İs-shara aıasynda «Qazaqstan men Ózbekstan tarıhyn zertteýdiń ózekti máseleleri» taqyrybynda halyqaralyq ǵylymı-tájirıbelik konferensıa ótti, dep habarlaıdy Almaty-akshamy.kz Mádenıet jáne aqparat mınıstrliginiń baspasóz qyzmetine silteme jasap.
Jıynǵa QR MAM Arhıv, qujattama jáne kitap isi komıteti jáne «Ýzarhıv» agenttiginiń, Shymkent qalasy ákimdiginiń, Qazaqstan jáne Ózbekstan Respýblıkasynyń memlekettik arhıvteriniń ókilderi, sondaı-aq tarıhshylar men ólketanýshylar, mádenıet salasynyń qyzmetkerleri qatysty.
Konferensıada QR MAM Arhıv, qujattama jáne kitap isi komıteti tóraǵasynyń orynbasary Rollan Quspan mınıstr Aıda Balaevanyń quttyqtaý hatyn oqydy.
«Biz - ortaq shekaramyz ǵana emes, tarıhy men mádenıeti, ádebıeti men óneri uqsas baýyrlas halyqpyz. Ortalyq Azıa aımaǵynda Ózbekstan Respýblıkasymen aýqymdy maqsattarǵa qol jetkizýge baǵyttalǵan strategıalyq mańyzy zor birlesken jobalar iske asyrylýda. Qazaqstan men Ózbekstan arasyndaǵy mádenı yntymaqtastyq Memleket basshylarymyzdyń saıasatynyń arqasynda qarqyndy damyp keledi. Biz birlesken kúsh-jigerimizdiń arqasynda mádenı muralardy zertteýde, Qazaqstan men Ózbekstannyń memlekettik arhıv qorlarynda saqtalǵan qundy tarıhı málimetterdi anyqtaýda tabysqa jetetinimizge senimdimin», - delingen habarlamada.
Óz kezeginde Ózbekstan Respýblıkasy Ádilet mınıstrligi janyndaǵy «Ýzarhıv» agenttigi tóraǵasynyń orynbasary Sherzod Sadyqov eki el arasyndaǵy arhıvtik qarym-qatynasty nyǵaıtyp, jan-jaqty damytýǵa vedomstvo tarapynan barynsha qoldaý kórsetiletinin jetkizdi.
Konferensıada tarıhty zertteýdegi arhıv qujattarynyń orny men róli, arhıv salasynyń jaǵdaıy jáne damý perspektıvalary, arhıvtik qujattardyń saqtalýyn qamtamasyz etýdiń zamanaýı tehnologıalary týraly jan-jaqty talqylandy.
Sondaı-aq halyqaralyq is-shara aıasynda eki eldiń memlekettik arhıvteri uıymdastyrǵan kórme ótti.