Mınıstr buıryqqa qol qoıdy.
Bilim jáne ǵylym mınıstri Asqat Aımaǵambetov oqýshylardyń oqý jetistikterin baǵalaý erejesi ózgeretinin týraly Ǵacebook paraqshasynda jazdy, dep habarlaıdy Almaty-akshamy.kz.
«Oqýshylardyń oqý jetistikterin baǵalaý erejelerine ózgerister engizý týraly buıryqqa qol qoıdym. Osyǵan deıin habarlaǵanymyzdaı, buıryqta «Altyn belgi» tósbelgisin alý talaptary aıtarlyqtaı kúsheıtildi. Esterińizge sala keteıin, talaptardy kúsheıtý týraly sheshim muǵalimderdiń 2021 jylǵy tamyz keńesinde qabyldanǵan bolatyn»,- dep jazdy mınıstr.
Onyń aıtýynsha, osylaısha, kelesi jyldan bastap 9-synypty aıaqtap, arnaıy atestat jáne 10-11 synyptardyń barlyq oqý toqsany boıynsha «úzdik» degen baǵa alǵan oqýshylar «Altyn belgi» tósbelgisine úmitker bola alady.
«Sondaı-aq talapkerler NZM bazasynda matematıkadan emtıhan tapsyrýy kerek. Bul shara akademıalyq adaldyqty qamtamasyz etý úshin qabyldanǵanyn túsiný mańyzdy. Bul rette NZM-de emtıhan tapsyratyndarǵa da, jalpy bilim beretin mektep bazasynda tapsyratyndarǵa da tapsyrmalar birdeı bolady. Byltyr mektep bitirýshiler rekordtyq «Altyn belgi» aldy. Keıbireýleri UBT nátıjesi boıynsha tómen bal aldy», - delingen mınıstdiń jazbasynda.
Asqat Aımaǵambetovtyń sózine júginsek, túlekterdiń tómen bal alýyna baılanysty úmitkerlerdi úzdik belgisine obektıvti jáne ashyq baǵalaý úshin emtıhandardyń biri táýelsiz bilim berý uıymynda ótedi. Bıyl mektep bitirýshiler emtıhandy óz mektebinde tapsyrady. Sondaı-aq belgiden bas tartý týraly ótinishter jaramsyz.
Talaptarǵa saı keletin úmitkerler belgilengen tártipte qorytyndy attestasıadan ótedi.
«Aıtpaqshy, normalar kelesi jyldan bastap kúshine engenimen, bıyl UBT qorytyndysy boıynsha bul belgini berýdiń obektıvtiligi baǵalanady. Osyǵan baılanysty mektep ákimshiligi, bilim basqarmalary men bólimderi qorytyndy emtıhandarynyń ashyqtyǵy men obektıvtiligin qamtamasyz etýi tıis. Árbir jaǵdaı boıynsha UBT nátıjeleriniń qorytyndylaryna taldaý júrgiziledi. Buıryqtyń mátini QR Ádilet mınıstrliginde tirkelgennen keıin jarıalanady», - dep jazdy mınıstr.