Májilis depýtaty Nıkıta Shatalov Qazaqstandaǵy ınternet-alaıaqtyqtyń kóbeıýin onlaın-kredıtterdiń qoljetimdiligimen baılanystyryp otyr. Ol Parlamentte sóılegen sózinde onlaın-kredıtterge tyıym salýdy talap etken onlaın-petısıany atap ótti.
Alaıda, Qarjy naryǵyn retteý jáne damytý agenttiginiń tóraıymy Mádına Ábilqasymova onlaın-kredıt berýge tyıym salýǵa qarsy ekenin aıtty. Onyń pikirinshe, bul sheshim banktik qosymshalardyń múmkindikterin shekteıdi.
«Bizge onlaın-kredıt berýge tyıym salý týraly usynys kelip tústi. Alaıda qazirgi tańda barlyq qarjylyq jáne banktik qyzmetter sıfrlandyrylǵan, olardy onlaın arqyly kórsetý keńinen qoldanylady. Bul kóptegen qazaqstandyqtardyń múddelerine áser etedi. Sondyqtan, azamattardyń onlaın qyzmetterge qoljetimdiligin shektemeý úshin, onlaın-kredıtterge tikeleı tyıym salý ázirge orynsyz dep sanaımyz. Onyń ornyna, onlaın-alaıaqtyqpen kúresýdiń basqa mehanızmderin qarastyrýdy usynamyz», — dedi Ábilqasymova.
Ol tyıym salý ornyna, kredıt berý ótinishterin tekserý merzimin uzartýdy usyndy. Ulttyq bank te onlaın-kredıtterge tyıym salýdyń tıimdi bolmaıtynyn qoldady.