Sońǵy 10 jylda tirkelgen nekeler sanynyń turaqty ósýi baıqalady.
Qazaqstanda neke qıýdy tirkeýdiń aı saıynǵy merzimin kúntizbelik 15 kúnge deıin qysqartý máselesi qarastyrylýda, sondaı-aq ártúrli ómirlik jaǵdaılardy eskere otyryp, merzimdi qysqartý múmkindigi saqtalady, dep habarlaıdy Almaty-akshamy.kz Egemen.kz silteme jasap.
«Qoldanystaǵy zańnama normalaryna sáıkes, nekege turý týraly ótinish nekeni memlekettik tirkeýden bir aı buryn beriledi», - delingen Ádilet mınıstrligi baspasóz qyzmetiniń habarlamasynda.
Kóptegen jup úshin bul tym uzaq jáne ony azaıtý úshin qosymsha qujattardy tirkeý kerek. Júktilik, balanyń týýy, taraptardyń biriniń ómirine tikeleı qaýip tónýi jáne basqa da erekshe jaǵdaılar sıaqty dáleldi sebepter bolǵan jaǵdaıda nekeni tirkeý merzimin bir kúnge deıin qysqartýǵa bolady. Ol úshin tıisti qujattardy, medısınalyq mekemelerden, jumys nemese oqý oryndarynan anyqtamalardy usyný kerek.
Kóptegen erli-zaıypty tirkeý organdaryna júgingen kezde toı kúnin aldyn ala belgilep, meıramhanalarǵa tapsyrys beredi, sodan keıin ǵana nekeni tirkeýge ótinish beredi. Alǵash úılengeli otyrǵan ári balasy joq jastar úshin qujattardan tek jeke kýálik pen memlekettik baj salyǵyn tóleý talap etiledi.
Aıta keteıik, Qazaqstanda sońǵy 10 jylda tirkelgen nekeler sanynyń turaqty ósýi baıqalady. 2018 jyly 138 876 neke qıylsa, 2019 jyly 139 735, 2020 jyly 129 165, 2021 jyly 140 762. Pandemıa yqpal etkendikten, 2020 jyly nekege turýǵa nıet bildirgender az bolǵan.