Derekterdi berý avtomatty rejımde júzege asady.
Elimizde munaı men gaz kondensatyn esepke alýdyń aqparattyq júıesi ónerkásiptik paıdalanýǵa engizildi, dep habarlaıdy Almaty-akshamy.kz.
Energetıka mınıstrliginiń málimetinshe, júıege qazirdiń ózinde 25 munaı óndirýshi uıym, 4 munaı tasymaldaýshy kompanıa jáne 3 munaı óńdeý zaýyty qosyldy. Qazir qalǵan óndirýshi kompanıalardy júıege qosý jumystary júrgizilip jatyr.
«Aqparattyq júıeni qurý jáne engizý jumystary «Sıfrlyq Qazaqstan» baǵdarlamasy men «Sıfrlandyrý, ǵylym jáne ınovasıalar esebinen tehnologıalyq serpilis» ulttyq jobasy sheńberinde Energetıka jáne Sıfrlyq damý, ınovasıalar jáne aeroǵarysh ónerkásibi mınıstrlikteriniń basshylyǵymen júrgizildi. Aqparattyq júıe munaıdy daıyndaý, óńdeý jáne tasymaldaý kezeńderinde esepke alý aspaptarynan derekter jınaýdy avtomattandyrady. Derekterdi berý avtomatty rejımde júzege asady», - delingen Energetıka mınıstrliginiń baspasóz qyzmetiniń habarlamasynda.
Munaı men gaz kondensatyn esepke alýdyń aqparattyq júıesine engizýdiń negizgi kórsetkishteri:
- jedel derekter negizinde memlekettik deńgeıde basqarýshylyq sheshimder qabyldaýdy qoldaý;
- shıki munaı men gaz kondensatynyń aınalymyn boljaý;
- esepke alý aspaptarynan alynǵan derekter negizinde esepterdi avtomatty qalyptastyrý.
«Budan basqa esepteý aspaptarynan derekterdi avtomatty túrde jınaý jer qoınaýyn paıdalanýshylarǵa kúndelikti eseptilikti qolmen tapsyrý shyǵystaryn qysqartýǵa, sondaı-aq adamı faktordy alyp tastaýǵa baılanysty derekterdi durys engizbeý táýekelderin barynsha azaıtýǵa múmkindik beredi», - delingen habarlamada.