Proaktıv qyzmet túrine aýysty.
Qazaqstanda múgedektikti taǵaıyndaý prosesi qaıta qaralyp, jańarady. Bul týraly Eńbek jáne halyqty áleýmettik qorǵaý vıse-mınıstri Erbol Ospanov málim etti, dep habarlaıdy Almaty-akshamy.kz QazAqparatqa silteme jasap.
«Byltyr 1 qazannan bastap múgedektikti belgileý proaktıv qyzmet túrine aýysty. Azamat múgedek ekenin dáleldeý úshin, aldymen medısınalyq tekserýden ótedi. Medısınalyq tekserýdiń nátıjesine qaraı, oǵan múgedektik beriledi nemese bas tartylady. Eger rastalsa, ol azamatqa járdemaqy taǵaıyndalady. Sonymen qatar, múgedek janǵa ońaltý quraldary men shıpajaı emi qajet. Ol qyzmetti múgedek ákimdikten alady. Osy oraıda, ózi densaýlyǵynan aırylǵan azamat, biz ony ártúrli memlekettik organdarǵa júgirtip qoısaq. Árıne, bul durys emes. Sondyqtan, atalǵan múgedektikti rastaý prosesi proaktıv qyzmet túrine aýystyryldy», - dedi Erbol Ospanov Ortalyq komýnıkasıalar qyzmeti alańynda ótken baspasóz máslıhatynda.
Sondaı-aq, vıse-mınıstr múgedektikti taǵaıyndaý prosesi qaıta qaralyp, jańaratynyn aıtty.
«Jyl saıyn 250 myń azamat múgedektigin rastap nemese qaıta rastaýdan ótip jatady. Sonyń 21 paıyzy proaktıvti túrde rastaldy, ıaǵnı eshqaıda barmaı-aq múgedek retinde tirkeldi. Endi azamattar múgedektigin rastaý úshin burynǵydaı júgirmeıdi, qaǵazbastylyq joıylyp, adamı faktor azaıdy», - deıdi ol.