Qazan aıynyń ekinshi jeksenbisinde elimizde múgedektigi bar azamattar kúni atap ótiledi, dep habarlaıdy aqshamnews.kz.
Eńbek jáne halyqty áleýmettik qorǵaý mınıstrliginiń málimetinshe, táýelsizdik alǵan 30 jyldan astam ýaqyt ishinde respýblıkada erekshe qajettilikteri bar adamdardyń quqyqtaryn qorǵaý jáne ómir súrý sapasyn arttyrý saıasaty júıeli túrde iske asyrylýda. Bul kún – ár adamnyń túrli erekshelikterine qaramastan ózin qundy jáne qajet ekenin sezinetin ınklúzıvti qoǵam qurýdyń mańyzdylyǵyn atap ótýdiń taǵy bir salmaqty sebebi bolyp tabylady.
Búginde Qazaqstanda erekshe qajettilikteri bar 732 myńnan astam adam turady. Olardyń kópshiligi ózderiniń ómirlik mysaldarymen stereotıpterdi buzyp, eger árkim ózine senetin bolsa, múmkin emes eshnárse joq ekenin dáleldegen azamattar.
Múgedektigi bar adamdardyń arasynda daryndy sýretshiler, tabysty bıznesmender, qoǵam qaıratkerleri bar. Olar ınovasıalyq tehnologıalar jasap, shabyt syılaıtyn kitaptar jazyp, áleýmettik jobalar jasaýda. Olar qoǵam damýyna baǵa jetpes úles qosyp keledi.
Bıyl Parıjdegi Paralımpıada oıyndarynda úzdik nátıje kórsetken múgedektigi bar sportshylarymyz elimizdiń erekshe maqtanyshtaryna aınaldy. Bizdiń respýblıka quramasy 9 medalǵa ıe boldy: 2 altyn, 3 kúmis jáne 4 qola. Olardyń jetistikteri múgedektik qol siltep, bárinen kúder úzýge bolmaıtynynń aıqyn mysaly bolyp tabylady.
Paralımpıadalyq oıyndardaǵy jetistik memleketimizdiń múgedektigi bar azamattardyń quqyqtaryn qorǵaý, ómir súrý sapasyn jaqsartý jáne erekshe qajettilikteri bar adamdardy qoǵam ómirine qosý boıynsha dáıekti saıasattynyń nátıjesi.
Elimizdede múgedektigi bar azamattarǵa bilim berý, jumyspen qamtý, densaýlyq saqtaý, áleýmettik kómek, ońaltý qyzmetteri, saıası jáne qoǵamdyq ómirge qatysý jáne t. b. quqyqtaryn júzege asyrýǵa kepildik beretin zańnama bar. Barlyq óńirlerde qoljetimdi orta qurý, jumysqa ornalastyrý jáne jumyspen qamtýdy qamtamasyz etý, arnaýly áleýmettik qyzmetter kórsetý jáne erekshe qajettilikteri bar adamdardy tehnıkalyq kómekshi quraldarmen jáne arnaýly júrip-turý quraldarymen qamtamasyz etý jóninde sharalar qabyldanýda.
«Osy jyly elimiz BUU-da Múgedektigi bar azamattardyń quqyqtary týraly konvensıany júzege asyrý maqsatynda qabyldanǵan sharalar týraly alǵashqy baıandamany qorǵady. BUU komıteti Qazaqstan qabyldap jatqan sharalardy joǵary baǵalady jáne 2030 jylǵa deıingi ınklúzıvti saıasat tujyrymdamasynda iske asyrylatyn birqatar mańyzdy usynymdardy usyndy.
Biz búginge deıin kóptegen qyzmet atqardyq, biraq ári qaraı damý úshin odan da kóp jumystar atqarýymyz qajet. Barlyǵy qoljetimdi jáne ınklúzıvti qoǵam qurý úshin birge jumys isteıik!», – dep atap ótti QR Eńbek jáne halyqty áleýmettik qorǵaý mınıstri Svetlana Jaqypova.