Búginde bir mıllıonnan astam Qazaqstan azamaty shetelde krıptovalútany saýdalap, paıda taýyp otyr.
Májilis krıptovalúta men maınıngke qatysty zań jobasyn ázirledi. Osy aptada tómengi palata depýtattary ony birinshi oqylymda maquldady. Endi ekinshi oqylym bar. Oǵan deıin zań jobasyna taǵy birqatar túzetý engizilýi múmkin, dep habarlaıdy Almaty-akshamy.kz Almaty.tv-ge silteme jasap.
Degenmen qazirdiń ózinde osy saladaǵy negizgi talaptar belgili jáne aldaǵy ýaqytta ózgeriske ushyramaıtyn sıaqty.
Beısresmı málimetke sáıkes, búginde bir mıllıonnan astam Qazaqstan azamaty shetelde krıptovalútany saýdalap, paıda taýyp otyr.
Maınerler zańdy tulǵa bolyp tirkeledi
Jańa zań jobasyn daıyndaýǵa bir jyl ketken eken. Mamandar krıptobırja men maınıng salasyn kóleńkeden shyǵaryp, barlyǵyna ortaq salyq júıesine engizýge tyrysty. Osy qujat qabyldansa, maınerler, treıderler men ınvestorlarǵa naqty talap qoıylady. Olar:
maınıngke lısenzıa alý;
krıptobırjalardy "Astana" Halyqaralyq qarjy ortalyǵynda ashý;
maınıngten túsken tabystyń 75 prosentin otandyq krıptobırjalarda aıyrbastaý;
qosymsha salyq tóleý.
Osylaısha, maınerler Qazaqstanda resmı túrde tirkelýge mindetti bolady.
"Bul degenimiz, maınerler zańdy tulǵa retinde tirkelip, salyq salynatyn sýbektige aınalady. Maınıng-pýldar da ekonomıkanyń bir bóligi bolady", - deıdi depýtat Ekaterına Smyshláeva.
Resmı málimetke sáıkes, Qazaqstanda maınıngpen aınalysatyn 150 kompanıa bolǵan.
Vıse-mınıstr Jandos Nurmaǵanbetovtyń aıtýynsha, osy ýaqytqa deıin úshten bir bóligi basqa elge ketip qaldy nemese jabyldy. 50 kompanıa resmı túrde tirkeldi.
"Qalǵany zańsyz maınıng bolyp sanalady. Olarǵa qatysty suraq kóp. Qural-jabdyqtardy qalaı ákelip júr? Energıany qalaı tutynady? Qaı jerde ornalasqan?", - dedi Nurmaǵanbetova jýrnalıserge bergen suhbatynda.
Alaıda búginde maınıngti úıde jasaıtyn azamattar da joq emes. Aldaǵy ýaqytta olar resmı túrde tirkelýge mindetti bolady. Al lısenzıany sıfrlyq damý mınıstrligi beredi degen jospar bar.
Krıptobırjalar qalaı jumys isteıdi
Qazaqstanda krıtovalútamen tólem jasaýǵa tyıym salynǵan. Depýtat Smyshláevanyń sózine qaraǵanda, úimet pen ulttyq banktiń osy máselege qatysty ustanymy ázirshe ózgermeıdi. Olar krıptovalútaǵa senbeıdi. Sondyqtan krıptobırjalardy "Astana" Halyqaralyq qarjy ortalyǵynda ashýǵa sheshim qabyldandy, biraq saýda-sattyq ortalyq aımaǵynanda ǵana jasalady. Osylaısha, krıptovalútamen tabys taýyp júrgen adam bırjada tirkelýge mindetti bolady.
Depýtat Ǵazız Qulahmetovtyń aıtýynsha, búdjetke de qyrýar qarjy túsýi kerek.
"Beıresmı derekterde osy krıptomen aınalysatyn adamdardyń qarjy aınalymy mólsheri aldyńǵy jyldary 5 mıllıard dollar boldy deıdi. Eger rasynda solaı bolsa, onda qazynaǵa biraz salyq túsýi kerek edi, biraq ondaı aqshanyń túskeni sezilgen joq", - deıdi Qulahmetov.
Sol beıresmı málimet boıynsha búginde halyqaralyq krıptobırjalarda bir mıllıonnan astam Qazaqstan azamaty tirkelgen. Barlyǵy krıptovalútany saýdalaıdy. Ony sur sqemalar arqyly aıyrbastaý faktileri de joq emes. Osylaısha, krıptovalútamen jasalatyn operasıalardyń barlyǵy derlik kóleńkede qalyp otyr. Sonyń bárin qazaqstandyq bırjalarǵa aýystyrýdyń nátıjesinde aıyrbastaý operasıalarynyń ashyqtyǵyn qamtamasyz etý josparlanǵan.
Al maınerler 2024 jyldan bastap tabystyń 75 prosentin otandyq krıptobırjalarda aıyrbastaýǵa mindetteledi. Olardan qoldanystaǵy salyqtan bólek syıaqysyna qosarlanǵan qun salyǵy, maınıng pýldyń tabys salyǵy, sondaı-aq, krıptobırjadaǵy operasıalar úshin tólem alynady.
Qazirgi jospar boıynsha krıptobırjalar memlekettik kirister komıtetiniń aqparattyq júıelerimen ıntegrasıalanady. Maınıngke qajetti qural-jabdyqtardyń reestri de engiziledi. Sonyń arqasynda Qazaqstanda jetkiziletin qural-jabdyqtar baqylaýǵa alynady.