Karantın kezinde Qazaqstanǵa kim kóship keldi? Kimder elin tastap, syrtqa ketti?
Almaty-akshamy.kz Finprom.kz saıtyna silteme jasaı otyryp, koronavırýs kezindegi kóshi-qon kórsetkishi jóninde habarlaıdy.
Alǵashqy toqsannyń qorytyndysy boıynsha, elimizge 2,1 myń adam kóship kelgen, bul ótken jylmen salystyrǵanda, 51,6%-ǵa az. Al kóship ketkenderdiń sany 5,5 myń adam, bul kórsetkish te aldyńǵy jylǵa qaraǵanda 24,9%-ǵa kem.
Qazaqstanǵa kóship kelgenderdiń 1,6 myńy— eńbekke jaramdy azamattar. Elimizden ketip qalǵan eńbekke qabiletti adamnyń sany budan kópteý —4 myń. 15 jastan kishi 204 bala kóship kelse, osy jas mólsherindegi 1,3 myń bala kóship ketken.
Kóship kelgenderdiń arasynda 204 adam jumysqa ornalasý maqsatymen, al 11 adam oqýǵa kelgen. Elimizdiń 301 turǵyny jumys izdep, syrtqa ketse, 53 shákirt bilim izdeýge attanǵan.
Anyqtama úshin: 2020 jylǵy osy ýaqytta elimizden 7,3 myń adam ketip, 4,3 myń adam kóship kelgen bolatyn.
Qonys aýdarǵandardyń 82% -y TMD elderine ketken, 4,5 myń adam, bul byltyrǵymen salystyrǵanda 31,2% -ǵa az. Onyń ishinde 4,4 myń adam Reseıge kóshken. Qonys aýdarýshylardyń basym bóligi Ózbekstan men Belarýssıaǵa ketip jatyr.
Álemniń basqa elderine 18% emıgrant qonys aýdarǵan, bul 995 adam, byltyrǵydan 30,2%-ǵa artyq. Onyń 745 -i Germanıaǵa ketken. Izraıl men Polshaǵa qonys aýdarýshylar kóp.
Al TMD elderinen kelgenderdiń sany 1,7 myń adam, bul byltyrǵydan 43,6%-ǵa az. Sonyń ishinde 851 adam Reseıden, 518 adam — Ózbekstannan, 125 adam — Qyrǵyzstannan kelgen.
TMD quramyna kirmeıtin basqa elden kóship kelgender sany 350 adam, bul byltyrǵydan 3,5 ese az. Kóbisi Qytaı, Túrkıa men Aýǵanstannan kelgen.
Elden ketken 15 jastan joǵary eńbekke jaramdy adamnyń kóbi tehnıkalyq mamandyqtardyń ıeleri. Bıylǵy úsh aıdyń kórsetkishi boıynsha, elimizden 933 adam kóship ketken, bul byltyrǵydan 25,3%-ǵa kem. Sondaı-aq elimizden syrtqa 466 ekonomıs, 249 pedagog, 186 medısına qyzmetkeri, 113 zańger kóship ketken.
Al elimizge kelgenderdiń ishinde 244 tehnıkalyq maman, 126 ekonomıs, 70 pedagog, 62 medısına qyzmetkeri, 48 zańger bar.
