Kıikti zańsyz aýlaǵandar 10 jylǵa deıin bostandyǵynan aıyrylady.
Qazaqstannyń Ekologıa, geologıa jáne tabıǵı resýrstar mınıstrligi el boıynsha «Kıik» aksıasy bastalǵanyn jarıalap, brakonerlerge 10 jylǵa deıin bas bostandyǵynan aıyrý jazasy qarastyrylǵanyn eske saldy, dep habarlaıdy Almaty-akshamy.kz QazAqparatqa silteme jasap.
Reıd barysynda kıikterdi zańsyz aýlaý faktilerin anyqtaý jáne aldyn alý boıynsha jumystar júrgiziledi.
Tabıǵatty qorǵaýǵa baǵyttalǵan keń aýqymdy aksıa jylyna eki ret ótkiziledi – kıikterdiń kúıleý kezeńinde, ıaǵnı 1 jeltoqsannan 31 jeltoqsanǵa deıin jáne olardyń tóldeý kezeńinde – 15 sáýir-15 mamyr aralyǵynda.
«Kıik aksıasyna «Ohotzooprom» ÓB» RMQK-nyń 224 ınspektory, sonymen qatar QR EGTRM Orman sharýashylyǵy jáne janýarlar dúnıesi komıtetiniń aýmaqtyq bólimsheleri men quqyq qorǵaý organdary qyzmetkerlerinen turatyn mobıldi toptar qatysady. Eske salaıyq, kıikterdi zańsyz aýlaý, satyp alý, saqtaý, ótkizý, tasymaldaý úshin múlki tárkilenip, 3 jyldan 10 jylǵa deıin bas bostandyǵynan aıyrylý jazasy qarastyrylǵan», - delingen mınıstrlik habarlamasynda.