Biraq kásipkerlik qyzmet laýazymdyq mindetterin oryndaýǵa kedergi keltirmeýi tıis.
Qazaqstan Konstıtýsıasyna sáıkes kelmeıtin keıbir zań normalary joıylmaq. Tıisti zań jobasyn birinshi oqylymda Májilis depýtattary maquldady, dep habarlaıdy aqshamnews.kz.
Qujatqa sáıkes, memlekettik fýnksıalardy oryndaýǵa ýákiletti tulǵalarǵa kásipkerlikpen aınalysý quqyǵyna qoıylǵan shekteý Konstıtýsıaǵa qaıshy dep tanyldy.
"Iaǵnı, memlekettik qyzmetshilerge teńestirilgen tulǵalar endi kásipkerlik qyzmetpen aınalysa alady. Olarǵa RMQK, komýnaldyq kásiporyndar, komýnaldyq memlekettik mekemeler, sonyń ishinde mektepter men aýrýhanalardaǵy basqarýshylyq fýnksıalardy júzege asyratyn tulǵalar jatady. Bular – birinshi basshylar, olardyń orynbasarlary, memlekettik satyp alý departamentteriniń basshylary, fılıaldardyń basshylary", – dedi Májilis depýtattarynyń aldynda sóılegen sózinde Sybaılas jemqorlyqqa qarsy qyzmet tóraǵasynyń orynbasary Ulan Sarqulov.
Alaıda kásipkerlik qyzmet laýazymdyq mindetterdi oryndaýǵa kedergi keltirmeýi, qyzmettik múlikti paıdalanýdy týyndatpaýy jáne laýazymdyq mindetterimen múddeler qaqtyǵysyna ákelmeýi tıis.
Kásipkerlik qyzmetpen aınalysýǵa qoıylǵan tyıymdy saqtap qalý usynylady:
▪ aýmaqtyq saılaý komısıalarynyń turaqty negizde ókilettikterin júzege asyratyn múshelerine;
▪ Ulttyq bank qyzmetkerlerine;
▪ Qarjy naryǵyn retteý jáne damytý agenttigi qyzmetkerlerine;
▪ "Qazaqstan avıasıalyq ákimshiligi" AQ qyzmetkerlerine;
▪ ulttyq holdıńter men ulttyq kompanıalardaǵy basqarýshylarǵa;
▪ búdjetten qarjylandyrylatyn jobalardy tańdaý jáne satyp alý salasyndaǵy bólimshelerge