Ábilhan Qasteev atyndaǵy Qazaqstan Respýblıkasynyń Memlekettik óner mýzeıinde Qazaqstannyń Halyq sýretshisi Sabyr Ábdirasyluly Mámbeevtiń (1928-2017) «SHEBERDİŃ KESKİNDEMESİNDEGİ PORTRET» atty jeke kórmesi ashylady. Ekspozısıada sýretshiniń otbasylyq qorynan alynǵan jıyrmadan astam keskindemelik týyndysy qoıylady.
Qazaqstannyń Halyq sýretshisi Sabyr Ábdirasyluly Mámbeev – 1950 jyldardaǵy Qazaqstan beıneleý óneri býynynyń ókili. Sol jyldary qazaq beıneleý óneriniń órleýi Máskeý, Lenıngrad, Harkov, Kıev qalalaryndaǵy kórkemóner joǵary oqý oryndarynda bilim alǵan K. Teljanov, M. Kenbaev, G. Ismaılova, A. Ǵalymbaeva, K. Shaıahmetov, S. Mámbeev jáne basqa da daryndy sýretshilerdiń kelýimen baılanysty boldy. Kásibı bilim alǵan qazaq sýretshileri beıneleý ónerine jańasha ún qosty. Keskindeme salý tásilderi dástúrli rýhanı-kórkem qundylyqtarmen baıytylyp, sýretshilerdiń shyǵarmashylyǵy ulttyq kolorıtpen jańǵyrtyldy.
– Sabyr Mámbeev beıneleý ónerinde ulttyq keskindeme tili men ózindik mánerin tabýǵa umtylǵan alǵashqy qazaq sýretshileriniń biri boldy. Bıylǵy kórme sýretshiniń shyǵarmashylyǵyndaǵy portret janryna arnalady. Bul týyndylardyń arasynda kórermender nazaryna alǵash ret usynylyp otyrǵan jumystar da bar, – deıdi kórme jetekshisi, mýzeıdiń «Qazaqstan beıneleý óneri» bóliminiń aǵa ǵylymı qyzmetkeri L. Ábildaeva.
Sabyr Ábdirasyluly 1946 jyly Almaty kórkemóner ýchılıshesin, 1953 jyly KSRO Kórkemóner akademıasynyń I. E. Repın atyndaǵy Lenıngrad keskindeme, músin jáne sáýlet ınstıtýtyn támamdady. Almaty kórkemóner ýchılıshesinde sabaq berdi. 1963 jyly «Qazaq KSR-niń ónerine eńbek sińirgen qaıratker» ataǵyn aldy. 1978 jyly «Halyqtar dostyǵy» ordenimen marapattaldy. 1980 jyly «Qazaq KSR Halyq sýretshisi» ataǵyna ıe boldy. Birneshe ret Qazaqstan Sýretshiler odaǵynyń tóraǵasy bolyp saılandy.
Kórme 8 qazan kúni ashylyp, 27 qazanǵa deıin jalǵasady.