Búgin Memleket basshysy Qasym-Jomart Toqaev Parlament palatalarynyń birlesken otyrysynda Qazaqstan halqyna joldaýyn jarıalady, - dep habarlaıdy Aqshamnews.kz tilshisi.
Memleket basshysy jasandy ıntellektimen jumys isteý quziretin qalyptastyrý mektep qabyrǵasynan qolǵa alyný kerektigin aıtty.
«Ekonomıkany jan-jaqty jańǵyrtý jumystary adam kapıtalyn damytýǵa qatysty jańa mindetter júkteıdi. Bul jerde bilim berý salasy aıryqsha ról atqarady.
«Keleshek mektepteri» ulttyq jobasy aıasynda josparlanǵan 217 mekteptiń 150-i qazirdiń ózinde jumys istep tur. Qalǵan mektepterdiń qurylysy aldaǵy úsh aı ishinde aıaqtalýǵa tıis.
Sıfrlyq tehnologıalar jahandyq eńbek naryǵyn jyldam ózgertip jatyr. Álemde jasandy ıntellektimen jumys isteýdiń qyr-syryn biletin mamandarǵa degen suranys jyl ótken saıyn artyp keledi. Jumys úderisteriniń edáýir bóligi sıfrlyq tehnologıalardy engizý arqyly avtomattandyrylatyny anyq.
Sol sebepti, meniń tapsyrmammen 100 myńǵa jýyq stýdentti tehnologıalyq jobalarǵa tartýdy kózdeıtin Al-Sana baǵdarlamasy júzege asyryla bastady.
Alaıda jasandy ıntellektimen jumys isteý quziretin qalyptastyrý áldeqaıda erte jastan, ıaǵnı mektep qabyrǵasynan qolǵa alynýǵa tıis. Osyǵan oraı birqatar bastamany júzege asyrǵan jón. Eń aldymen, mektep oqýshylaryna arnalǵan jasandy ıntellekt negizderi týraly baǵdarlama jáne oqý materıaldaryn ázirleý qajet. Ustazdardyń jasandy ıntellekt tehnologıasyn meńgerý daǵdysyn da qalyptastyrý kerek bolady.
Pezıdent qashyqtan oqytý tásili jáne jasandy ıntellekt tehnologıasy negizinde «Qazaq Digital Mektebi» atty shaǵyn jınaqty mektep úlgisin ázirleý qajettigin aıtty. Mundaı platforma aýyldaǵy oqýshylardy sapaly oqý tásilderimen qamtamasyz etýge múmkindik beredi.
«Elordada balalardy damytý ortalyqtaryn jeke qarajat tartý arqyly salý tájirıbesi bar. Muny barlyq aımaqqa taratý qajet. Kóptegen kásipker dál osy másele boıynsha kómek kórsetýge ázir ekenin bildirip jatyr. Ákimder osyndaı jobalardy júzege asyrýǵa kásipkerlerdi belsendi túrde jumyldyrýy kerek», - dedi ol.