Onyń 200-den astamy qaıǵyly jaǵdaımen aıaqtalady.
Jyl saıyn 28 sáýirde Dúnıejúzilik eńbek qaýipsizdigi jáne eńbekti qorǵaý kúni atap ótiledi, onyń maqsaty – jumysshylardyń quqyqtaryn qorǵaý, olardyń áleýmettik qorǵalýyn jáne eńbek qaýipsizdigin arttyrý máselelerine nazar aýdarý. Sońǵy 5 jylda eńbekti qorǵaý salasynda memlekettik organdar men jumys berýshiler qabyldaǵan keshendi sharalar 1 myń jumyskerge shaqqanda óndiristik jaraqattaný deńgeıin 0,23-ten 0,21-ge deıin tómendetýge múmkindik berdi, dep habarlaıdy Almaty-akshamy.kz QR Eńbek jáne halyqty áleýmettik qorǵaý mınıstrligine silteme jasap.
2024 jylǵy Dúnıejúzilik qaýipsizdik jáne densaýlyq kúniniń taqyryby – «Klımattyń ózgerýiniń eńbek qaýipsizdigi men densaýlyǵyna áseri». Bul aqparattyq-túsindirý naýqany eńbek qaýipsizdigi máseleleri jáne óndiriste jaraqat alý, aýrý jáne ólim sanynyń kóbeıýi týraly halyqtyń habardarlyǵyn arttyrýǵa arnalǵan.
Halyqaralyq eńbek uıymynyń derekteri eńbekti qorǵaý salasyndaǵy aýqymdy problemalardyń saqtalyp otyrǵanyn kórsetedi – jyl saıyn álemde 270 mıllıonǵa jýyq jazataıym oqıǵalar men 160 mıllıon kásiptik aýrýlar tirkeledi, olar 2 mıllıonnan astam adamnyń ómirin qıdy.
Qazaqstanda jyl saıyn kásiporyndarda 1400-den astam óndiristik jazataıym oqıǵa oryn alady, onyń 200-den astamy ólimmen aıaqtalady. Ekonomıka salalary boıynsha zardap shekkenderdiń eń kóp sany taý-ken metalýrgıa kesheni kásiporyndarynda – 21,3%, qurylys salasynda – 10% baıqaldy.
519 myńnan astam jumysker zıandy jáne qaýipti eńbek jaǵdaılarynda jumys isteıdi. Árbir úshinshi jumysshy (37%) – shý men dirildiń kúsheıýi jaǵdaıynda, árbir tórtinshi (25%) – jumys aımaǵynda gaz ben shańnyń joǵarylaýynda, árbir segizinshi (13%) qolaısyz temperatýralyq jaǵdaılarda jumys isteıdi.
107 myńnan astam adam (21%) aýyr dene eńbegimen aınalysty.
Attestasıa qorytyndysy boıynsha 2023 jyly 697 myń jumysshy zıandy eńbek jaǵdaıynda jumys istegeni úshin túrli ótemaqylar aldy. Bul maqsattarǵa jumys berýshiler 255 mlrd teńge bóldi, bul 2022 jylmen salystyrǵanda 23%-ǵa artyq.
Sońǵy bes jylda eńbekti qorǵaý salasynda memlekettik organdar men jumys berýshiler qabyldaǵan sharalar óndiristik jaraqattaný deńgeıin (1000 jumysshyǵa shaqqandaǵy jazataıym oqıǵalardyń jıilik koefısıenti) 0,23-ten 0,21-ge deıin tómendetýge múmkindik berdi.
Qazaqstanda salaýatty jáne qaýipsiz eńbek jaǵdaılaryn odan ári qamtamasyz etý úshin keshendi sharalar qabyldanýda.
2023 jyldyń qorytyndysy boıynsha quqyq qorǵaý organdaryna jazataıym oqıǵalar týraly 1055 materıal jiberilip, olar boıynsha 149 qylmystyq is qozǵaldy.
Jumys oryndaryndaǵy eńbek jaǵdaılarynyń naqty jaǵdaıyn baǵalaý maqsatynda 10 myńnan astam óndiristik nysandardy atestattaý júrgizildi.
Buzýshylyqtardyń aldyn alý jáne boldyrmaý maqsatynda elimizdiń 3214 kásiporny eńbek qaýipsizdigi jáne eńbekti qorǵaý standarttaryn engizdi.
2019 jyldan bastap Nóldik jaraqattar tujyrymdamasy – Vision Zero – belsendi túrde alǵa jyljýda. Oǵan búginde respýblıkanyń 536 kásiporny qosyldy.
Qazaqstannyń 258 kásiporny qurylys salasynyń merdigerlik uıymdarynda qaýipsiz eńbek jaǵdaılaryn qamtamasyz etý úshin baqylaýdyń tikeleı modelin engizdi.
Zıandy eńbek jaǵdaıynda jumys isteıtin jumyskerlerdi áleýmettik qorǵaýdyń qosymsha tetikterin iske asyrý sheńberinde Memleket basshysynyń tapsyrmasy boıynsha 2024 jyldyń 1 qańtarynan bastap arnaýly áleýmettik tólemder engizildi. Bul tólemderge 55 jasqa tolǵan jáne keminde 7 jyl mindetti kásiptik zeınetaqy jarnalary tólengen qyzmetkerler quqyly. Osy múmkindikti paıdalanyp, jyl basynan beri 6 myńǵa jýyq jumysshy zıandy eńbek jaǵdaılaryndaǵy jumysyn toqtatyp, arnaıy áleýmettik tólemder alyp jatyr.
Qazaqstan Respýblıkasy Eńbek jáne halyqty áleýmettik qorǵaý mınıstrligi (budan ári – Eńbekmıni) óz aldyna eńbek jaǵdaılary zıandy jumys oryndaryn edáýir qysqartý jáne óndiristik jaraqattaný deńgeıin tómendetý mindetin qoıyp otyr.
Ótken jyldyń sońynda Úkimettiń qaýlysymen 2030 jylǵa deıingi qaýipsiz eńbek Tujyrymdamasy bekitildi. Qujat táýekelge baǵdarlanǵan tásil negizinde eńbekti qorǵaýdy basqarýdyń ulttyq júıesin jańǵyrtýdy, kásiptik táýekelderdi tómendetý jónindegi sharalardy ekonomıkalyq yntalandyrýdy, eńbekti qorǵaý salasyndaǵy kásiptik quzyretter men ǵylymı áleýetti damytýdy, eńbekti qorǵaý salasyndaǵy baqylaý men monıtorıńtiń tıimdiligin arttyrýdy kózdeıdi.
Eńbekmıni jumys berýshilerdi eńbek qyzmeti prosesinde qyzmetkerlerdiń qaýipsiz eńbek jaǵdaılaryn qamtamasyz etý boıynsha barlyq kúsh-jigerin jumsaýǵa shaqyrady.