Qazaqstanda jyl basynan óndiriste 13 avarıa men 103 oqıǵa boldy. Bul týraly QR Tótenshe jaǵdaılar mınıstrliginiń málimetinde aıtyldy, dep habarlaıdy Almaty-akshamy.kz Inform.kz-ke silteme jasap.
Tótenshe jaǵdaılar mınıstrliginiń baspasóz qyzmetinen málim etkendeı, vedomstvo basshysy Iýrıı Ilın Qaraǵandy oblysyna jumys sapary kezinde «Arselor Mıttal Temirtaý» AQ basshylyǵyn Ónerkásiptik qaýipsizdik departamentine shaqyrtqan. Kezdesýde óndiristegi qaýipsizdik, jumysshylardyń eńbek jaǵdaılaryn jaqsartý jáne olarǵa áleýmettik qoldaý kórsetý máselelerin talqylandy. Arselor Mıttal Temirtaý basshylyǵy óndiristiń barlyq kezeńderinde qaýipsizdikti jetildirý boıynsha qabyldanyp jatqan sharalar týraly baıandaǵan.
«Iýrıı Ilın Ónekásiptik qaýipsizdik departamentine bıznes qaýymdastyqqa avarıalar men oqıǵalardyń sanyn azaıtý úshin qajetti ádistemelik kómek kórsetýdi tapsyrdy. Qaýipsizdik sharalary saqtalmaǵan jaǵdaıda, zań aıasynda qatań sharalar qabyldanatynyn, tipti óndiristiń jumysy toqtatylatyn eskertti. Sebebi 2022 jyldyń basynan beri óndiriste 13 avarıa men 103 oqıǵa tirkeldi», - delingen mınıstrliktiń baspasóz baıanynda.
Sonymen qatar sapar barysynda mınıstr «KÁAQQ» JSHS Respýblıkalyq ortalyq shtabynda boldy, onda Respýblıkalyq ortalyq shtabynyń jáne «AMT» AQ kómir departamentiniń basshylyǵymen birge taý-ken qutqarýshylaryn áleýmettik qoldaý jáne avarıalyq-qutqarý qyzmetteriniń zamanaýı quraldarmen, qural-jabdyqtarmen jáne tehnıkamen jaraqtandyrý jumystarymen tanysty. Budan bólek, Iýrıı Ilın oblys turǵyndarymen kezdesti.
Turǵyndar negizinen dala órtteri men sý tasqynyna baılanysty tótenshe jaǵdaılardyń aldyn alý, Qaraǵandy oblysyndaǵy tegin jaǵajaılar salý máselelerin kóterdi. Júzdesýge beınekonferensıa arqyly óńirdiń qalalary men aýdandarynyń turǵyndary qatysty.