Kólik mınıstrligi Qazaqstan joldarynda avtobýstar men júk kóligi júrgizýshileriniń jolaýshylardy, bagajdy nemese júkti tasymaldaý kezinde eńbek jáne demalys rejımin saqtaýyn baqylaý boıynsha aýqymdy aksıa ótkizýde. 9 qyrkúıekte bastalǵan aksıa 9 qazanǵa deıin jalǵasady, dep habarlaıdy aqshamnews.kz.
Kólikti basqarýdyń kúndelikti uzaqtyǵy qoldanystaǵy qaǵıdaǵa sáıkes 9 saǵattan aspaý kerek. Tórt jarym saǵat boıy úzdiksiz basqarǵannan keıin, júrgizýshi keminde 45 mınýt úzilis jasaýǵa tıis.
Aksıa bastalǵaly Avtomobıl kóligi jáne kóliktik baqylaý komıtetiniń qyzmetkerleri jalpy somasy 4 mıllıon teńgeden astam ákimshilik quqyq buzýshylyq týraly 218 hattama toltyrdy.
«Aksıa elimizdiń barlyq óńirinde ótip jatyr. Tahograf bul júrgizýshiniń eńbek jáne demalys rejımin, qozǵalys jyldamdyǵyn, júrip ótken jolyn úzdiksiz tirkeıtin sandyq qurylǵy. Bul qurylǵy jol qozǵalysy qaýipsizdigin qamtamasyz etýge múmkindik beredi. Qalaaralyq jáne halyqaralyq tasymal barysynda oryn alatyn jol kólik oqıǵalarynyń basty sebepteriniń biri júrgizýshiniń rejımdi saqtamaı, sharshaýy nemese ruqsat etilgen qozǵalys jyldamdyǵyn asyrýy bolyp tabylady.
Aksıa avtojoldardaǵy jol-kólik oqıǵalarynyń sanyn azaıtýǵa, jolaýshylardy, bagajdy jáne júkterdi tasymaldaý barysynda qaýipsizdikti qamtamasyz etýge, sondaı-aq avtokólik quraldary júrgizýshileriniń eńbek jáne demalys rejımin saqtamaýyn anyqtaý jáne aldyn alýǵa baǵyttalǵan», - dedi komıtettiń bas sarapshysy Kúnaıym Kámıeva.
Jalpy bul jumys turaqty júrgiziledi. Jyl basynan beri 2 700-den astam aýyr júk kóligi men avtobýs júrgizýshileri eńbek jáne demalys rejımin buzǵan. Kóliktik baqylaý ınspeksıasynyń qyzmetkerleri olarmen túsindirme jumystaryn júrgizip, hattama toltyrdy. Aıyppuldyń jalpy somasy 48 mln teńgeden asty.
Anyqtama úshin:
Tahograftarmen jabdyqtaýǵa avtobýstar, júk kólikteri, onyń ishinde:
- qaýipti júkterdi avtomobılmen tasymaldaýdy;
- jolaýshylardy, bagajdy jáne júkterdi avtomobılmen halyqaralyq tasymaldaýdy;
- jolaýshylardy jáne bagajdy avtomobılmen oblysaralyq, qalaaralyq turaqty tasymaldaýdy;
- jolaýshylardy jáne bagajdy avtomobılmen oblysaralyq, qalaaralyq, aýdanaralyq turaqty emes tasymaldaýdy júzege asyrý kezinde paıdalanylatyn kólikter jatady.
Qaǵıda talaptary saqtalmaǵan jaǵdaıda «Ákimshilik quqyq buzýshylyq týraly» QR Kodeksiniń 572-babymen tasymaldaýshylarǵa 10 AEK-ten 50 AEK (36 920 - 184 600 tg) aralyǵynda, júrgizýshilerge 10 AEK (36 920 tg) kóleminde ákimshilik aıyppul kózdelgen.