Elordada halyqaralyq deńgeıdegi Astana Media Week sharasy resmı túrde ashyldy
Bıylǵy aptalyqtyń basty taqyryby – «Medıanyń yqpaly jáne sıfrlyq úılesim». Aldaǵy úsh kún boıy jetekshi mamandar, halyqaralyq uıymdar ókilderi jáne belgili jýrnalıser medıa salasynyń ózekti máselelerin talqylaıtyn bolady.
Sonymen qatar, jahandyq medıa uıymdardyń ókilderi men sala kóshbasshylary pikir almasyp, álemdik trendter jáne medıa-kommýnıkasıa salasyndaǵy úzdik tájirıbelerin usynatyn bolady. Oǵan qosa, is-shara barysynda 25-26 qyrkúıek kúnderi «Kontent-Market» ótkiziledi. Bul sharada telearnalar men prodakshn stýdıalar ózderiniń medıa jobalaryn tanystyrady dep josparlanýda.
Ashylý saltanatynda Mádenıet jáne aqparat mınıstri Aıda Balaevanyń quttyqtaý hatyn vıse-mınıstr Qanat Ysqaqov oqyp berdi.
«Qurmetti áriptester, sizderdi jyl saıynǵy Astana Media Week sharasynyń ashylýymen quttyqtaımyn. Bıyl «Medıanyń áseri jáne sıfrlyq úndestik» taqyrybynda ótip jatqan aptalyq, qoǵamdaǵy ózgerister men aqparattyq tehnologıalardyń mańyzyn aıqyndaı túsýde. Medıa tek aqparat taratýshy ǵana emes, qoǵamdyq pikir qalyptastyrýshy ári mádenıetke yqpal etýshi ról atqarady. Sıfrlyq tehnologıalardyń damýy osy úrdisterdi jańa deńgeıge shyǵaryp, medıanyń yqpalyn kúsheıtedi. Bul medıa mamandarynyń biliktiligin arttyryp, jańa múmkindikter ashýǵa kómektesedi. Astana Media Week medıa salasynyń kóshbasshylary men sarapshylaryn bir arnaǵa toǵystyryp, mańyzdy máselelerdi talqylaýǵa arnalǵan kásibı alańǵa aınaldy. Barshańyzǵa sáttilik tileımin», – delingen quttyqtaýda.