Orta eseppen 13%-ǵa ulǵaıtylatyn bolady.
Qazaqstan Úkimeti jumysynan aıyrylýyna baılanysty memleket azamattaryna tólenetin kómek mólsherin ósirýdi kózdep otyr, dep habarlaıdy Almaty-akshamy.kz.
«Memleket basshysynyń osy jylǵy 1 qyrkúıektegi Qazaqstan halqyna Joldaýynda aıtylǵan tapsyrmasyn oryndaý úshin 2023 jylǵy 1 qańtardan bastap jumysynan aıyrylǵan jaǵdaıda Memlekettik áleýmettik saqtandyrý qorynan tólenetin áleýmettik tólem mólsheri orta eseppen 13%-ǵa ulǵaıtylatyn bolady. Áleýmettik saqtandyrý júıesin damytýdyń osy jáne basqa da sharalary QR Áleýmettik kodeksiniń jobasynda qarastyrylady», - delingen Eńbekmıni baspasóz qyzmetiniń habarlamasynda.
Qoldanystaǵy zańnamaǵa sáıkes jumystan bosatylyp jáne jumyssyz retinde tirkelgender mindetti áleýmettik saqtandyrý júıesine qatysý ótiline jáne sońǵy 24 aıdaǵy tabysyna baılanysty jumysynan aıyrylý boıynsha 1 aıdan 6 aıǵa deıin áleýmettik tólemder alady. Bul tólem joǵalǵan tabystyń 40% - na deıingi mólsherde MÁSQ qarajaty esebinen júzege asyrylady.
Memleket basshysynyń tapsyrmasyn oryndaý úshin QR Áleýmettik kodeksiniń jobasynda jumysynan aıyrylǵan jaǵdaıda tólenetin áleýmettik tólemniń mólsherin esepteý úshin tabysty almastyrý koefısıentin 40-tan 45% - ǵa deıin arttyrý kózdelgen. Nátıjesinde, osy tólemderdiń mólsheri orta eseppen 13%-ǵa ulǵaıtylady.
Jumys berýshilerdiń MÁSQ-ke olardyń qyzmetkerleri úshin áleýmettik aýdarymdar mólsherlemesiniń belgilengen mólsheri ózgerissiz qalatynyn atap ótý qajet.
Sonymen birge atalǵan qujatta tabysty joǵaltý boıynsha áleýmettik táýekelderdiń barlyq 6 túri boıynsha (jumysynan aıyrylý; eńbekke qabilettiliginen aıyrylý; asyraýshysynan aıyrylý; júktilikke jáne bosanýǵa baılanysty tabysynan aıyrylý; jańa týǵan balany asyrap alýǵa baılanysty tabysynan aıyrylý; bala bir jarym jasqa tolǵanǵa deıin onyń kútimine baılanysty tabysynan aıyrylý) jumyspen qamtylǵan halyqty mindetti áleýmettik saqtandyrýmen qamtýdy keńeıtý kózdelgen.
Áleýmettik saqtandyrý júıesine jumysshylardyń kelesi sanattaryn qosý usynylady:
- azamattyq-quqyqtyq sıpattaǵy sharttar boıynsha tabys alatyn jeke tulǵalar;
- ınternet-platformalar men platformalyq jumyspen qamtýdyń mobıldi qosymshalary arqyly qyzmet kórsetetin jeke tulǵalar. Bul rette ınternet-platforma operatory jeke tulǵa úshin shart boıynsha alynǵan tabystyń 1% mólsherinde áleýmettik aýdarymdar júrgizetin bolady.
MÁSQ qarajaty esebinen jumysynan aıyrylǵan jaǵdaıda tólenetin áleýmettik tólem jumystan bosatylý sebepterine qaramastan júzege asyrylatynyn jáne jumyssyz adam jumys izdep júrgen kezeńde ony qoldaýǵa arnalǵanyn esterińizge sala keteıik. Sondyqtan da áleýmettik tólem quqyǵy jumystan bosatylǵan adam jumyssyz retinde tirkelgen kúnnen bastap paıda bolady.