Oqytý barlyq nıet bildirýshiler úshin qazaq jáne orys tilderinde qoljetimdi.
Elektrondyq eńbek bırjasy bazasynda Biryńǵaı sıfrlyq ekojúıe nemese basqasha aıtqanda, jumyspen qamtý salasyndaǵy onlaın qyzmetter sýpermarketi qurylatyn bolady. Bul ekojúıe azamattardy kásibı jolynda mamandyq tańdaýdan bastap eńbek qatynastaryn resimdeýge deıin qoldap otyrady, dep habarlaıdy Almaty-akshamy.kz.
Búgingi tańda EEB bazasynda jumyspen qamtý salasyndaǵy bolashaq sýpermarkettiń 6 negizgi quramdas bóliginiń 5-eýi iske asyryldy.
«EEB negizgi elementi – bul jumysqa ornalastyrý boıynsha biryńǵaı sıfrlyq alań Enbek.kz. Ol 205 jumyspen qamtý ortalyǵynan, 44 jeke jumyspen qamtý agenttiginen jáne 5 onlaın jumyspen qamtý alańynan bos oryndardy shoǵyrlandyrady. Bul alańda azamattar baǵyttar, kásipter jáne daǵdylar boıynsha laıyqty bos jumys oryndaryn, al jumys berýshiler – olardyń talaptaryna sáıkes keletin qyzmetkerlerdi izdeı alady»,- delingen Eńbekmıni baspasóz qyzmetiniń habarlamasynda.
Bul rette Armenıa, Belarýs, Qyrǵyzstan men Reseıdiń ulttyq aqparattyq júıelerine qoljetimdiligi bar «Shekarasyz jumys» biryńǵaı izdeý júıesiniń arqasynda tek Qazaqstanda ǵana emes, Eýrazıalyq ekonomıkalyq odaq elderinde de jumys tabýǵa bolady.
«EEB arqyly jumyspen qamtý salasyndaǵy kórsetiletin memlekettik qyzmetterdi de ońaı alý múmkin bolady. Ótken jyly 126 myń adam onlaın formatta jumyssyz retinde tirkeldi. Platforma arqyly azamattar jumysynan aıyrylýǵa baılanysty áleýmettik tólem alýǵa, sýbsıdıalanǵan jumys oryndaryna jumysqa ornalasýǵa, jumys kúshi tapshy aımaqtarǵa qonys aýdarý úshin ótinish bere alady. Bıyl atalǵan kórsetiletin memlekettik qyzmetterdi EEB arqyly 314,2 myńnan astam adam paıdalandy», – dep, atap kórsetti «Eńbek resýrstaryn damytý ortalyǵy» AQ prezıdenti Dáýlet Arǵyndyqov.
Sondaı-aq EEB bazasynda halyq úshin qajetti daǵdylar boıynsha Skills Enbek – marketpleıs kýrstarynyń onlaın oqytý platformasy jumys isteıdi. Oqytý barlyq nıet bildirýshiler úshin qazaq jáne orys tilderinde qoljetimdi. Búgingi tańda 157-den astam kýrs ornalastyrylǵan, olardyń 103-i tegin.
Bul rette 124 myńǵa jýyq adam belgili bir kýrstan ótip, tıisti daǵdylardy ıgerý týraly sertıfıkat aldy. Bul daǵdylar biryńǵaı sıfrlyq ekojúıeniń arqasynda bilim alýshy-izdenýshi tarapynan basy artyq kúsh salýsyz túıindemeni ornalastyrý jáne eńbek qatynastaryn resimdeý servısterinde avtomatty túrde kórsetiletin bolady.
«Jumyspen qamtýdyń sıfrlyq ınfraqurylymyndaǵy taǵy bir jańalyq HR Enbek platformasy – jaldamaly jumysshylardyń eńbek jolyn sıfrlyq esepke alý alańy boldy. Búginde platformany 272 myńǵa jýyq jumys berýshi paıdalanady, bul eldegi barlyq jaldamaly qyzmetkerlerdiń 63%-yn qamtıdy», – dep tolyqtyrdy sózin Dáýlet Arǵyndyqov.
Portaldyń kómegimen elektrondy eńbek sharttaryn jasaý múmkindigi bar, osylaısha qyzmetkerler avtomatty túrde elektrondy eńbek kitapshasyn da toltyra alady. Memlekettik organdardyń aqparattyq júıelerimen ıntegrasıanyń arqasynda basy artyq qujattar men anyqtamalardy jınamastan jumyskerlerdiń jeke isterin avtomatty túrde qalyptastyrýǵa bolady.
Platforma bızneske elektrondy kadrlyq is júrgizýdi tıimdi júrgizýge, qyzmetkerlerdi jaldaý kezinde shyǵyndar men derekterdi burmalaý táýekelderin azaıtýǵa múmkindik beredi.
Sonymen qatar jumys berýshiler úshin eńbek zańnamasynyń talaptaryn saqtaýǵa anonımdi ózin-ózi dıagnostıkalaý servısi iske qosyldy.
Sondaı-aq, jumyspen qamtýdyń sıfrlyq ekojúıesiniń mańyzdy elementi Business Enbek platformasy bolyp tabylady, ol bıznes-ıdeıalardy iske asyrýǵa memlekettik granttar alýdyń: ótinish berýden bastap granttyń ózin alýǵa deıingi barlyq prosesterin tolyq avtomattandyrý úshin iske asyrylǵan. Barlyq qujattama elektrondyq formatta resimdeledi. Qazirgi ýaqytta 12 myńnan astam ótinim maquldandy. Jyl sońyna deıin barlyǵy 20 myń grant berý josparlanyp otyr.
«Sonymen qatar biz Sıfrlyq jumyspen qamtý ortalyqtaryna kóshýdi júzege asyryp jatyrmyz, ıaǵnı jumyspen qamtý salasynda buryn oflaın formatta kórsetiletin barlyq qyzmetter sıfrlandyrylatyn bolady. İzdenýshiler keıs-menedjmentti qoldana otyryp, komýnıkasıanyń barlyq qoljetimdi tásilderimen jeke keńes jáne qoldaý sharalaryn ala alady. Bul halyq úshin memlekettik qyzmetterdiń barlyq spektriniń qoljetimdiligi men sapasyn arttyrýǵa múmkindik beredi», – dep atap ótti Dáýlet Arǵyndyqov.
Kelesi jyly taǵy bir mańyzdy element – mamandyqtar boıynsha sıfrlyq jol siltegishti iske qosý josparlanýda. Ol eńbek naryǵyndaǵy barlyq mamandyqtar týraly aqparat jıyntyǵynyń bir túri bolady, odan árbir izdenýshi belgili bir mamannyń ne isteıtinin, ol úshin qandaı bilim qajet ekenin, ortasha jalaqy mólsherin, eńbek naryǵyndaǵy osyndaı kadrlarǵa degen qajettilik týraly bile alady. Bul mamandyq pen odan ári mansap tańdaý aldynda turǵandarǵa kómektesedi.