Elordada jaýyn qurttarymen qorektenetin boıjetken turady.
Ol jándikti tek paıdaly bolǵany úshin emes, dámi unaǵandyqtan jeıtin kórinedi, dep habarlaıdy Almaty-akshamy.kz Elorda.info-ǵa silteme jasap.
Iana Mazýrenko qurttyń dámi makaron ispettes ekenin aıtqan.
«Dámi shala pisirilgen makaron sıaqty. Shaınaǵan kezde dámi jaqsy, sebebi qabyǵy qytyrlaq, al ishi jumsaq, marmelad sıaqty», – deıdi turǵyn.
23 jastaǵy boıjetken 8-synyptan bastap jaýyn qurttarymen korektenedi. Óz baqshasynan omyrtqasyz jándikterdi tańdap jegendi unatady eken.
«Jazda baqshadan qazyp alatynmyn, qazir olardy satyp alýǵa, saıttan izdeýge týra keledi. Qysta baǵasy ósedi, shynymdy aıtsam, bul – óte qymbat», – deıdi elordalyq turǵyn.
Boıjetkenge 24 qurt jetkilikti kórinedi.
Dese de dárigerler budan adam parazıt juqtyrýy múmkin ekenin aıtady.
«Qurttardy jeý arqyly adam parazıtterdi juqtyrýy múmkin. Denesine parazıtter enip, ómir súrýi múmkin. Ol aǵzaǵa teris áser etip, kúızeliske ushyraýy múmkin», – dedi gastroentrolog Gúlmıra Dýmyk.
Taǵy bir keıipker taý jynystaryn, topyraq, saz, bor jeıdi eken.
«Dámi ák sıaqty. Ák ıiskep, sony jep jatqan sıaqtymyn. Sondaı balǵyn. Jańa ǵana boıalǵan syndy. Óte dámdi», – dedi Ásıa Áýbákirova.
Mektepte ol bor jegen. Keıinirek tabıǵı, hımıalyq qospalarsyz, dámdi bor bolatynyn bilgen. Bordan basqa topyraq pen sazdy da jeýge bolady deıdi. Ári onyń túrli assortımenti bar. Eki júzden astam túri satylady.
«Taýardy Reseıden, Ýkraınadan satyp alamyz. Qazaqstanda da bor karerleri bar. Mysaly, napoleon tortqa uqsaıdy. Bul – óte dámdi. Sonymen qatar Oral sazy da suranysqa ıe», – dedi bor, saz jáne gýrman topyraǵyn satýshy Aqjan Qabıden.
Aqjan bor, saz satýmen eki jyldan beri aınalysady. Klıentter jetkilikti deıdi. Psıhologtar men dıetologtar muny pıkasızm, ıaǵnı qumarlyqty tamaqtaný tártibiniń buzylysy dedi.
«Saz nemese borǵa táýeldilik bul adam aǵzasynda bir nárse jetispeıtindigin bildiredi. Aǵzada mıkroelementter jetkiliksiz», – deıdi gastroentrolog.
Gúlmıra Dýmyk adam aǵzasyn toksınderden qorǵaý mańyzdy ekenin aıtady. Sol sebepti bor men saz paıdaly bolýy múmkin. Biraq olardy taza kúıinde jemegen jón. Óıtkeni denede aýyr metal tuzdaryn jınap alý qaýpi bar. Odan góri quramynda bor nemese saz bar paıdaly vıtamınder jıyntyǵyn nemese dári-dármekter tutyný qajet.