Jataqhana salý isine jeke merdiger kompanıalar tartylady.
Qazaqstandyq mınıstr jataqhanalardaǵy oryn tapshylyǵy máselesin sheshý joldaryn aıtty, dep habarlaıdy Almaty-akshamy.kz QazAqparatqa silteme jasap.
«Biz jataqhanadaǵy oryn tapshylyǵyn sheshý úshin birneshe sharalardy qabyldadyq. Birinshiden, joǵary oqý orny bos turǵan nemese tolyq bolmaǵan hostel, qonaq úılermen kelisimshart jasady. Olardan 10 aılyq, ıaǵnı uzaq merzimge tólemaqylary bir deńgeıde kelisilgen kelisimsharttar arqyly birneshe myń tósek-oryndy aldyq. Ekinshiden, Indýstrıa jáne ınfroqurylymdyq damý, Densaýlyq saqtaý mınıstrligimen kelisip, qazir stýdentter turyp jatqan jataqhanalardyń sanıtarlyq normalaryna ózgeris engizdik. Mysaly, jataqhanalardaǵy qoımalar, bos jatqan zaldardy stýdentter tura alatyndaı etip jasaqtadyq. Onyń arqasynda birneshe myń jańa oryndy shyǵaryp aldyq», - dep jaýap berdi Ǵylym jáne joǵary bilim mınıstri Saıasat Nurbek.
Saıasat Nurbektiń aıtýynsha, keler jyldan bastap jataqhana salý isine jeke merdiger kompanıalar tartylady. Ol úshin qurylys kásiporyndarymen birge jasalatyn shart talaptaryna ózgeris engizilgen.
«Úshinshi ári negizgi shara - bizdiń mınıstrliktiń janyndaǵy Qarjy ortalyǵy merdiger kompanıalarmen, qurylys kompanıalarymen sharttardy jańartty. Nege deseńiz, basynda kóp merdiger jataqahana qurylysyna kirmeýge nemese burynǵy sharttan bas tartýǵa tyrysatyn. Óıtkeni, onyń merzimi uzaq edi – 8 jyl. Sonymen qatar, tólemderi de joǵary emes. Bul rette 50-den astam merdiger kompanıamen kezdesýler ótkizip, sol sharttardy olardyń talaptaryna yńǵaılap, osy aıdyń basynda Úkimettiń tıisti qaýlysy qabyldandy. Kelesi jyldan bastap osy máseleni túbegeıli sheshý úshin qurylys kompanıalarymen jumys isteımiz. «Atameken» UKP da buǵan belsendi qatysty, ıaǵnı 100 paıyz bul máseleni sheshý úshin biz jekemenshik sektormen jumys isteýimiz kerek. Úkimettiń óziniń tolyq shamasy da kelmeıdi. Sonymen qatar, demografıalyq ósim jyldan-jylǵa qarqyn alyp kele jatyr», - dedi Saıasat Nurbek.