10 myń jasqa jumys oryndaryn usyný josparlanǵan.
Qazaqstan Úkimeti jastardy jumyspen qamtý maqsatynda jańa jobany iske qosty, dep habarlaıdy Almaty-akshamy.kz.
«QR Eńbek jáne halyqty áleýmettik qorǵaý mınıstrligi «Eńbek resýrstaryn damytý ortalyǵy» AQ jáne Eurasian Resources Group kompanıalar tobymen birlesip «Jastardy jumysqa ornalastyrý» birlesken jobasyn iske qosty. Joba aıasynda 35 jasqa deıingi 10 myń jasqa jumys oryndaryn usyný josparlanǵan», - delingen Eńbekmıni baspasóz qyzmetiniń habarlamasynda.
Joba aıasynda 2022 jylǵy mamyrdan bastap «Enbek.kz» elektrondyq eńbek bırjasynda kez kelgen adam ERG kompanıalar tobynan jumys taba alady.
«Enbek.kz» portalynyń basty betinde banner ornalasqan, ony basý arqyly jumys izdeýshiler ERG tobyndaǵy kompanıalardyń HR-qyzmetteri ornalastyrǵan bos jumys oryndarynyń tizimimen tanysa alady.
Joba iske qosylǵannan beri ártúrli mamandyqtar boıynsha 346 bos jumys orny ornalastyryldy. Olardyń arasynda tehnıkalyq nemese medısınalyq biliktilikti qajet etetin jáne arnaıy bilimi joq adamdarǵa arnalǵan bos jumys oryndary da bar.
ERG 28 jyldan beri tabysty jumys tájirıbesi bar, tabıǵı resýrstardy óndirý men óńdeý salasyndaǵy jetekshi kompanıalardyń qatarynda. ERG quramyna «Qazhrom» Transulttyq kompanıasy» AQ, «Sokolov-Sarybaı taý-ken baıytý óndiristik birlestigi» AQ, «Qazaqstan alúmınıi» AQ, «Qazaqstan elektrolız zaýyty» AQ, «Eýroazıalyq energetıkalyq korporasıa» AQ, «Eýrazıa» Medısınalyq ortalyǵy» JSHS jáne basqa da iri kásiporyndar kiredi.