Elimizde turǵyn úıdi jalǵa alý quny bir jylda 18 paıyzǵa qymbattady.
Baspana jaldaý qunynyń qymbattyǵy jóninen Qazaqstan 107 eldiń arasynda 82-orynda tur, dep habarlaıdy Almaty-akshamy.kz Energyprom.kz saıtyna silteme jasap.
Qazaqstan 82-oryn alǵan bul reıtıńte memleketterdiń qala ortalyǵyndaǵy aı saıynǵy jalǵa beriletin (bir jatyn bólmeli) turǵyn úıdiń quny salystyrylǵan. Atalǵan reıtıń boıynsha Qazaqstanda páter jaldaý baǵasy $303,85 boldy.
Baǵasy sharyqtap turǵan jaldamaly páterler Gonkong, Sıngapýr jáne BAÁ-de bolsa, turǵyn úı jaldaýdyń eń arzany Nepalda eken.
TMD elderiniń ishinde turǵyn úıdi jalǵa alý, Qazaqstan Respýblıkasyna qaraǵanda, Ázirbaıjanda arzanyraq – aıyna 266,3 AQSH dollary shamasynda.
Reseıde aı saıynǵy páter jaldaý aqysy 412,51, Armenıada — 396,74, Ýkraınada — 366,11, Ózbekstanda — 322,27, Belorýssıada — 306,17 AQSH dollary turady.
2021 jyldyń jeltoqsanynda Qazaqstanda jaıly turǵyn úıdi jalǵa alý baǵasy bir jylda 17,5%-ǵa ósti, ıaǵnı 1 sharshy metr úshin alynatyn aqy 1,9 myń teńgege deıin qymbattady
Elimizdiń iri qalalarynyń ishinde jalǵa alý baǵasy birden 40,6%-ǵa kóterilgen Almaty qalasy bolyp tur. Bul úshtikke Oral men Shymkent qalalary da kirdi. Sáıkesinshe, bul qalalardaǵy qymbatshylyq 32,5% jáne 31,3%-dy quraıdy. Qymbattaý boıynsha eń az jyldyq ósim Taraz qalasynda tirkeldi, naqtyraq aıtqanda, páter jaldaý baǵasy 5,5%-ǵa artqan.
Baspana jaldaýdyń eń qatty qymbattaǵany elordada da baıqaldy: ár sharshy metr úshin 3,7 myń teńge. Eń «qymbat» qalalardyń qatarynda Almaty (3,3 myń teńge) men Aqtaý (2,4 myń teńge) tursa, «eń arzan» qala Taraz (1,4 myń teńge) boldy.