Mobıldi ınternet quny álemdegi eń tómen kórsetkishke ıe.
Qazaqstan ınternet pen sıfrlandyrýdyń joǵary qarqynymen erekshelenetin 10 eldiń qataryna endi, dep habarlaıdy Almaty-akshamy.kz Egemen.kz silteme jasap.
Ótken jyly 6 jáne odan joǵary jastaǵy qazaqstandyqtardyń sıfrlyq saýattylyq deńgeıi jalpy halyqtyń 85,3%-yn quraǵan. Bul elimizdegi árbir bes tutynýshynyń tórteýi derbes kompúter, smartfon, planshet, noýtbýkty paıdalanýǵa daǵdylanǵanyn, sondaı-aq standartty baǵdarlamalardy paıdalanyp, Internet arqyly qyzmet ala alatynyn kórsetedi. Bul rette úı sharýashylyqtaryn uıaly telefondarmen qamtamasyz etý qazirdiń ózinde 99,4%-dy qurap otyr.
Elimizde mobıldi ınternet quny álemdegi eń tómen kórsetkishke ıe. Osylaısha, 2022 jylǵa arnalǵan ınternetke qoljetimdilik ındeksiniń sońǵy reıtıńine sáıkes, Qazaqstan ınternettiń eń tómen tarıfteri boıynsha 8-orynǵa ıe boldy.
Qazaqstandyqtar 1 GB mobıldi ınternet úshin nebári $0,8 tóleıdi.
Salystyrmaly túrde, kórshiles Ózbekstanda aıyna 1 GB úshin 1,3 AQSH dollary, Tájikstanda – 3,5 AQSH dollar tólense, ınternet tarıfi 17,5 dollarǵa jetken Túrikmenstan Afrıka elderi jáne aral memleketterimen birge aýtsaıderler qataryna kirdi.
Qazaqstannan basqa úzdik ondyqqa Reseı, Qyrǵyzstan jáne Belarýs memleketteri de kirdi. Sarapshylardyń aıtýynsha, Qazaqstandaǵy mobıldi ınternetpen qamtýdyń joǵary deńgeıi – 96% quraıdy.