Bul qujat jańa sharalar eskerile otyryp ázirlendi.
Premer-Mınıstr Álıhan Smaıylovtyń tóraǵalyǵymen ótken Úkimet otyrysynda Geologıalyq salany damytýdyń 2023-2027 jyldarǵa arnalǵan tujyrymdamasynyń jobasy qaraldy, dep habarlaıdy Almaty-akshamy.kz.
Ekologıa, geologıa jáne tabıǵı resýrstar mınıstri Serikqalı Brekeshevtiń aıtýynsha, Tujyrymdamanyń negizgi maqsaty – paıdaly qazbalardy barlaýǵa ınvestısıa tartý úshin jaǵdaı jasaý. Sonymen qatar salanyń negizgi problemalaryn sheshý úshin kelesi tórt baǵyt boıynsha jumys júrgizý josparlanyp otyr: 1) jer qoınaýyn geologıalyq zertteýdiń tıimdiligin arttyrý jáne mıneraldyq-shıkizat bazasyn tolyqtyrý; 2) geologıa salasyn sıfrlandyrý jáne aqparattandyrý; 3) ǵylymı-zertteý jáne kadrlyq qamtamasyz etý; 4) ınfraqurylymdy damytý.
Indýstrıa jáne ınfraqurylymdyq damý mınıstri Qaıyrbek Óskenbaevtyń aıtýynsha, Tujyrymdama sheńberinde jer qoınaýyn paıdalaný salasynda lısenzıalar alý jónindegi rásimderdi barynsha jeńildetý, ınvestorlar men ýákiletti memlekettik organdar arasyndaǵy bıznes-prosesti avtomattandyrý, qatty paıdaly qazbalardy barlaý men óndirýge lısenzıalar berý prosesiniń «ashyqtyǵyn» qamtamasyz etý josparlanyp otyr.
Ári qaraı osy taqyryp boıynsha Energetıka mınıstri Bolat Aqsholaqov baıandama jasady.
Baıandamashylardy tyńdap bolǵan Premer-Mınıstr Qazaqstan mıneraldyq-shıkizattyq resýrstardyń sany men túri jaǵynan álemde jetekshi oryndardyń qatarynda ekenin, alaıda sońǵy jyldary paıdaly qazbalardyń kóptegen túri boıynsha jańa qorlardy ashý jumystary mardymsyz júrip jatqanyn atap ótti. Mysaly, taıaý onjyldyqta Shyǵys Qazaqstanda Orlov, Maleev, Tıshınskoe jáne Rıdder-Sokolnoe sıaqty iri metal ken oryndary ıgeriledi.
«Ónerkásiptik shıkizatqa suranystyń ósýi jańa ken oryndaryn izdep-taýyp, mıneraldyq-shıkizat bazasyn keshendi damytýdy talap etedi. Osyǵan baılanysty geologıalyq barlaý salasyna ınvestısıalar tartý úshin tıisti jaǵdaı jasaý qajet», - dedi Álıhan Smaıylov.
Úkimet basshysynyń aıtýynsha, búginde ınvestorlarǵa keshendi servıstik qoldaý kórsetý maqsatynda Ulttyq geologıalyq qyzmet quryldy, KAZNEDRA aqparattyq platformasy pılottyq rejımde jumys istep tur jáne jer qoınaýyn paıdalaný salasynda normatıvtik-quqyqtyq baza túbegeıli ózgerdi. Bul jer qoınaýy men geologıalyq aqparattyń barynsha qoljetimdi bolýyna, ken ornyn ashqan kompanıalardyń ony ári qaraı ıgerý úshin quqyqtaryn qorǵaýdy kúsheıtýge jáne barlyq prosedýrany aıtarlyqtaı jyldamdatýǵa múmkindik berdi.
«Búgin qaralyp otyrǵan Tujyrymdama jer qoınaýyn memlekettik geologıalyq zertteýdiń tıimdiligin arttyrýǵa baǵyttalǵan jańa sharalar eskerile otyryp, ázirlendi. Onda salany sıfrlandyrý, ınfraqurylymdy damytý, kadrlyq áleýetti arttyrý sıaqty salany damytýdyń basym baǵyttary kórinis tapqan», - dedi Premer-Mınıstr.
Usynylǵan tujyrymdama boıynsha daýys berý rásimi ótkizilgennen keıin Álıhan Smaıylov Ekologıa, geologıa jáne tabıǵı resýrstar mınıstrligine múddeli memlekettik organdarmen birlesip, oǵan engizilgen bastamalardyń tıimdi iske asyrylýyn qamtamasyz etýdi tapsyrdy.