Emmanúel Makron Qazaqstan Fransıanyń strategıalyq seriktesi ekenin atap ótti.
2024 jyly Qazaqstanda fransýz tilinde oqytatyn jańa mektepter ashylady. Bul týraly Fransıa Prezıdenti Emmanúel Makron Qazaqstan Prezıdentimen kezdesý barysynda aıtty, dep habarlaıdy Almaty-akshamy.kz Aqordanyń baspasóz qyzmetine silteme jasap.
Parıjge resmı saparmen kelgen Memleket basshysy Qasym-Jomart Toqaev Fransıa Prezıdenti Emmanúel Makronmen keńeıtilgen quramda kelissóz júrgizdi. Kelissózge deıin Elıseı saraıynda resmı qarsy alý rásimi ótti.
Kezdesý barysynda Qasym-Jomart Toqaev Fransıaǵa resmı saparmen kelýge shaqyrǵany jáne Qazaqstan Prezıdenti laýazymyna qaıta saılanýyna oraı quttyqtaǵany úshin Emmanúel Makronǵa alǵys aıtty. Memleket basshysy bul sapar eki el arasyndaǵy strategıalyq seriktestikti nyǵaıtyp, qarym-qatynasty jańa deńgeıge kóterýge zor múmkindik beretinin atap ótti. Fransıa 2005 jyldan beri Qazaqstan ekonomıkasyna jalpy kólemi 17 mıllıard dollar ınvestısıa quıyp, eń iri bes ınvestor eldiń qataryna kirdi. Sońǵy 9 aıda ekijaqty taýar aınalymy 2,5 mıllıard dollarǵa jetti. Bul byltyrǵy osy kezeńmen salystyrǵanda 6,1 paıyzǵa joǵary.
Fransıanyń Ortalyq Azıa elderimen jasaǵan saýda-sattyǵynyń 90 paıyzy Qazaqstanǵa tıesili. Eki memleket energetıka, taý-ken óndirisi, jeńil ónerkásip, qurylys, aeroǵarysh, mashına jasaý, densaýlyq saqtaý jáne tamaq ónerkásibi salalarynda tıimdi jobalardy birlesip júzege asyryp keledi.
Qazaqstanda 170-ten astam fransıalyq kompanıa men birlesken kásiporyn jumys isteıdi. Olardyń arasynda ekonomıkamyzdyń jetekshi ınvestorlary sanalatyn Total Energies, Air Liquide, Airbus, Alstom, Orano jáne Danone sekildi kompanıalar bar. Byltyr elderimiz Saýda-ekonomıkalyq jáne ınvestısıalyq yntymaqtastyqtyń 2030 jylǵa deıingi jol kartasyn bekitti. Kelissóz barysynda Qasym-Jomart Toqaev elimizde júrgizilip jatqan saıası jáne ekonomıkalyq jańǵyrý úderisi jóninde aıtty. Óz kezeginde Emmanúel Makron Qazaqstan Fransıanyń strategıalyq seriktesi ekenin atap ótti. Eki el arasynda saýda-ekonomıkalyq yntymaqtastyq qarqyndy damyp keledi.
Energetıka salasynda birlesken jobalar júzege asyrylyp jatyr. Eýropalyq Odaq Qazaqstandaǵy túrli jobalarǵa ınvestısıa salyp keledi.
Fransıa Prezıdenti Qazaqstanda júrgizilip jatqan reformalarǵa qoldaý bildirdi.
Taraptar eki eldiń bilim jáne mádenıet salalaryndaǵy baılanystaryn nyǵaıtý jóninde pikir almasyp, halyqaralyq kún tártibindegi ózekti máselelerdi jáne Ortalyq Azıa óńirindegi jaǵdaıdy talqylady.
Kezdesý sońynda Qasym-Jomart Toqaev Emmanúel Makrondy Qazaqstanǵa saparmen kelýge shaqyrdy.