Bul týraly QR İİM Esirtki qylmysyna qarsy is-qımyl departamentiniń basqarma bastyǵy Baqytjan Ámirhanov aıtyp berdi.
Qazaqstanda esirtkini beımedısınalyq maqsatta qoldanǵany úshin jazany jeńildetý josparlanýda, dep habarlaıdy Almaty-akshamy.kz
«Esirtkini beımedısınalyq maqsatta qoldanǵany úshin jazany jeńildetýdi kózdeıtin eki zań jobasy ázirlendi. Iaǵnı, esirtkini az mólsherde qoldanǵan jáne saqtaǵan adamdar qylmystyq emes, ákimshilik jaýapkershilikke tartylady», - dedi Baqytjan Ámirhanov mınıstrlik uıymdastyrǵan onlaın-brıfıng barysynda.
Spıkerdiń aıtýynsha, zań jobasy prekýrsorlar men qatty áser etetin zattardyń zańsyz aınalymy úshin jaýapkershilikti kúsheıtýdi kózdeıdi. Sonymen birge, sıntetıkalyq esirtkiniń taralýyna qarsy is-qımyl máselelerin eldiń joǵary basshylyǵy memlekettik basqarý organdarynyń basym mindetteriniń biri retinde aıqyndaǵan.
Búgingi tańda 2022-2023 jyldarǵa arnalǵan Jol kartasy ázirlendi, onda shetelde óndirilgen esirtkilerdiń túsýine, olardyń el ishinde taralýyna jáne óndirilýine jol bermeý, esirtkige táýeldilerdi emdeý jáne ońaltý, sondaı-aq ishki ister, densaýlyq saqtaý, sot saraptamasy organdaryn jáne shekaralyq ótkizý pýnktterin materıaldyq-tehnıkalyq jaraqtandyrý sharalary kózdelgen.
Asa qaýipti bolyp sanalatyn mefedronnyń, pırovaleronnyń jáne olardyń analogtarynyń, sıntetıkalyq kannabınoıdtardyń «krımınaldyq» mólsheri 50 gramnan 1 gramǵa deıin zań júzinde tómendetildi. Olardy ótkizý maqsatynsyz saqtaǵany úshin qylmystyq jaýapkershilik kúsheıtilgen.