Arnaıy áleýmettik joba iske asyryla bastady.
Qazaqstan úkimeti jumyssyz, esh jerdi oqymaıtyn jastardy qoldaý maqsatynda arnaıy áleýmettik jobany iske asyra bastady, dep habarlaıdy Almaty-akshamy.kz.
«QR AQDM qoldaýymen Batys Qazaqstan oblysy boıynsha «Bolashaq» korporatıvtik qory NEET sanatyndaǵy jastardy qoldaýǵa baǵyttalǵan áleýmettik jobany iske asyrdy», - delingen Aqparat jáne qoǵamdyq damý mınıstrliginiń baspasóz qyzmetiniń habarlamasynda.
Batys Qazaqstan oblysy boıynsha «Bolashaq» korporatıvtik qorynyń dırektory Saltanat Tumanbaeva NEET sanatyna kimder jatatynyn jáne olardyń problemalary qalaı sheshilip jatqanyn aıtyp berdi.
«Joba NEET sanatyndaǵy jastarǵa qoldaý kórsetýdi kózdeıdi. Biz jastarǵa belsendi ómir saltyn júrgizýge kómektesýge tyrystyq. NEET – bul ártúrli ekonomıkalyq nemese áleýmettik faktorlarǵa baılanysty jumyspen qamtylmaǵan nemese esh jerde oqymaıtyn jastar», - dep atap ótti Saltanat Tumanbaeva.
Joba aıasynda respýblıkalyq jobalyq keńse qurylǵan bolatyn. Munda jas qazaqstandyqtar turǵyn úıge, jumysqa ornalasýǵa, jastarǵa arnalǵan memlekettik granttarǵa qatysty ózderin qyzyqtyrǵan suraqtarǵa jaýap aldy.
«Jalpy, 10 myńnan astam jas keńes aldy. Sondaı-aq, jobany respýblıkanyń 17 óńirinde sapaly iske asyrý úshin «Jas Otan» jastar qanatymen yntymaqtastyq týraly memorandýmǵa qol qoıyldy. Biz NEET sanatyndaǵy jastardy kásibı jetildirýge, olardy jumysqa ornalastyrýǵa, sportqa tartýǵa baǵyttalǵan túrli is - sharalardy ótkizdik», - dep atap ótti Saltanat Tumanbaeva.
Joba aıasynda NEET sanatyndaǵy jastardy áleýmettendirý, olarmen ataýly jumys jónindegi praktıkalyq usynystar jınaqtalǵan nusqaýlyq ta ázirlendi. Bul – memlekettik organdarǵa, úkimettik emes uıymdarǵa, jastardyń resýrstyq ortalyqtaryna jáne barlyq múddeli tulǵalarǵa arnalǵan anyqtamalyq qural.
Sonymen qatar, 21 kúndik marafon formatynda NEET sanatyndaǵy jastardyń kásibı jáne ómirlik daǵdylaryn damytýdyń avtorlyq baǵdarlamasy ázirlendi. Baǵdarlamanyń ereksheligi zamanaýı trendterdiń paıdalanylýynda bolsa kerek.
«Jas qazaqstandyqtardyń kóbisi oqyǵysy nemese jumys istegisi kelmeıtindigin moıyndaǵan jón. Eshkim adamnyń ómirin ózgertýge májbúrleı almaıdy. Bizdiń semınarlarǵa belsendi ómirlik ustanymy bar adamdar da qatysty. Olar ózin taba almaı júrgen jastarǵa baǵdar bere alady dep senemiz», - deıdi Saltanat Tumanbaeva.
Onyń aıtýynsha, jastar úshin TEDx kezdesýler, sheberlik synyptary, daǵdylar men quzyrettilikti arttyrýǵa baǵyttalǵan oqytý kýrstary sıaqty túrli formattaǵy is-sharalar ótkizildi.
Esterińizge sala keteıik, kásibı jáne ómirlik daǵdylardy oqytý baǵdarlamasy QR Aqparat jáne qoǵamdyq damý mınıstrliginiń qoldaýymen «Bilim berý prosesine jáne eńbekke tartylmaǵan jastardy áleýmettendirý sharalaryn ázirleý jáne iske asyrý» jobasy aıasynda ázirlendi.