Bir jyldyń ishinde tyıym ornatýǵa bolady.
«Temeki tútininen azat Qazaqstan úshin» ulttyq koalısıasynyń kóshbasshysy Jámıla Sadyqova elektrondy shylymnyń aksızin qymbattatýdy usyndy, dep habarlaıdy Almaty-akshamy.kz QazAqparatqa silteme jasap.
«Qyzdyrylatyn temekiniń ár danasyna aksız engizýden bólek Saýd Arabıasy men Birikken Arab ámirlikteriniń jaqsy tájirıbesi bar – elektrondy shylym qurylǵysynyń qunynan 50 paıyz alym tólenedi. Mysaly, bir ret qoldanýǵa arnalǵan elektrondy shylymnyń baǵasy 2 myń teńge bolsa, aksızi myń teńge bolady. Sonyń esebinen quny 3-3,5 myń teńgege qymbattaıdy», - dedi Jámıla Sadyqova Ortalyq komýnıkasıalar qyzmetinde ótken brıfıńide.
Sarapshynyń sózine qaraǵanda, osynyń arqasynda elektrondy shylymǵa balalardyń qol jetkizýi qıyndamaq.
«Biz de osyndaı aksız engizsek, elektrondy shylymnyń qoldanysyn shektep, sol shekteýli saýdanyń ózinen jaqsy tabys kórýge múmkindik alamyz. Iaǵnı ondaı saıasattan memleket utady. Ýkraınada elektrondy shylym aksızinen jyl saıyn 200 mlrd teńgedeı kiris túsip otyrǵan. Biz jyl saıyn 80 mlrd teńge kiris kirgize alamyz. Budan tek tabak ındýstrıasy ǵana zardap shegedi», - dedi qoǵamdyq uıym basshysy.
Ulttyq koalısıa jetekshisi Qazaqstan aýmaǵynda elektrondy shylymnyń aınalymyn shekteýdi usynyp otyr.
«Ázirge veıpterdiń (elektrondy shylym – red.) aınalymyna tyıym salynbaǵandyqtan, tek depýtattardyń usynysy kúıinde qalyp kele jatqandyqtan, bul naryqtan salyq óndirý kerek. Iaǵnı, naryqta bar kezinde jaqsy salyq óndirip qalý qajet. Ol búdjettiń kirisine túsedi. «Tútinsiz» shylymǵa tyıym 2020 jyly salyndy. Eki aıdyń ishinde tyıym kúshine endi de, naryq odan aýyr zardap shekken joq. Qazir sol kezde elge kirgizilip úlgergen qaldyǵy satylyp jatyr. Keıin múlde naryqtan joǵalady. Densaýlyq saqtaý mınıstrligi qoldasa, veıpterdiń satylymyna da bir jyldyń ishinde tyıym ornatýǵa bolady», - dedi Jámılá Sadyqova.
Buǵan deıin elimizde jalpy temekiniń aksızi ósetini habarlanǵan edi.