Elimiz boıynsha, 149 jyljymaly medısınalyq keshen jumys istep jatyr.
Bıyl elimizdiń 10 óńirinde 64 myń turǵynǵa medısınalyq kómek kórsetken eki medısınalyq poıyzdyń jumysy qaıta jandandy. Bul týraly Parlament Májilisindegi Úkimet saǵatynda QR Densaýlyq saqtaý mınıstri Ajar Ǵınıat aıtty, dep habarlaıdy Almaty-akshamy.kz QazAqparatqa silteme jasap.
«Bıyl praktıkalyq densaýlyq saqtaý qajettiligine sáıkes, óńirlerge 2981 jas maman, onyń ishinde aýylǵa 797 adam baǵyttaldy. Mınıstrlik ákimdiktermen birlesip turaqty negizde mamandardyń kelý monıtorıńin júzege asyrady. Al jergilikti organdar kelgen jas mamandardy turaqtandyrý baǵytynda tıisti qadamdardy iske asyrýy qajet», - dedi A. Ǵınıat aýyldaǵy densaýlyq saqtaý máselesin talqalýǵa arnalǵan Úkimet saǵatynda.
Onyń aıtýynsha, shalǵaı aýyldardyń turǵyndaryna medısınalyq qyzmetterdi jetkizý maqsatynda kólik medısınasy damyǵan. Medısınalyq kómek jáne konsýltasıalyq-dıagnostıkalyq qyzmetter kórsetetin 149 jyljymaly medısınalyq keshen jumys istep jatyr.
«Bıyl elimizdiń 10 óńirinde (Atyraý, Aqtóbe, Almaty, Abaı, Jetisý, Batys Qazaqstan, Shyǵys Qazaqstan, Qyzylorda, Pavlodar, Mańǵystaý oblystary) 64 myń turǵynǵa medısınalyq kómek kórsetken eki «Járdem» jáne «Salamatty Qazaqstan» medısınalyq poıyzynyń jumysy qaıta jandandy. Medısınalyq avıasıany aýyl turǵyndaryn tasymaldaıtyn jáne shuǵyl kómek kórsetetin 33 áýe kemesi (20 ushaq jáne 13 tikushaq) júzege asyrady. Aýylda jedel medısınalyq kómek kórsetý úshin 595 brıgada jumys isteıdi, osy baǵytta 1,5 mln shaqyrtýǵa qyzmet kórsetildi», - dedi mınıstr.
Budan buryn habarlanǵandaı, aýyldaǵy kadrlyq qamtamasyz etýge taldaý júrgizilip, 1 700-den astam medısına qyzmetkeriniń, onyń ishinde 1000-nan astam dárigerdiń tapshylyǵy anyqtaldy.