Bul shara áskerlerdiń jabdyqtaý jumysynyń tıimdiligin aıtarlyqtaı arttyrady.
Qazaqstan áskerıleri arnaıy uıymdastyrylǵan «Batyl toıtarys – 2022» atty oqý-jattyǵýǵa qatysyp jatyr, dep habarlaıdy Almaty-akshamy.kz.
««Batyl toıtarys – 2022» keshendi vedomstvoaralyq strategıalyq komandalyq-shtabtyq oqý-jattyǵýy sheńberinde bólimsheler áskerlerdi úzdiksiz jáne ýaqtyly qamtamasyz etý tapsyrmalaryn oryndaıdy», - delingen Qorǵanys mınıstrliginiń baspasóz qyzmetiniń habarlamasynda.
Oqý-jattyǵýdyń barlyq kezeńinde tyldyq jáne tehnıkalyq qamtamasyz etý sharalary ótkiziledi. Marsh barysynda qajetti tehnıkalyq kómek kórsetilip, aıaldamalarda tehnıkaǵa jaǵarmaı quıý júzege asady.
Belgilengen aýdandarǵa jetken soń dalalyq jaǵdaıda jeke quramǵa oq-dárilerdi jetkizý, qarý-jaraq pen áskerı tehnıkany jaýyngerlik qoldanýǵa daıyndaý, tamaqtandyrý jáne monsha-kir jýý qyzmetterin kórsetý uıymdastyryldy.
Ońtústik óńirde táýligine 5 tonna nan pisiretin mehanıkalandyrylǵan dalalyq nan zaýyty jumysqa kiristi.
Dalalyq oq-dári qoımalary, janarmaı quıý beketteri ashylyp, zaqymdalǵan mashınalardy evakýasıalaý quraldary men jóndeıtin sheberhanalary bar qosymsha pýnktter quryldy.
Áskerı qyzmetshilerge medısınalyq kómek kórsetýge qajetti elementteri bar dalalyq gospıtálder men lazaretterge ornalastyryldy.
Tyldyq jáne tehnıkalyq qamtamasyz etý – qyzmettiń mańyzdy baǵyttarynyń biri ekenin álemdik tájirıbe kórsetip otyr. Onsyz jaýyngerlik is-qımyldarda tabysqa jetý múmkin emes. Vedomstvoaralyq oqý-jattyǵý sheńberinde Ulttyq ulannyń, Shekara qyzmetiniń qolbasshylyǵymen, Tótenshe jaǵdaılar mınıstrliginiń basshylyǵymen, ortalyq memlekettik jáne jergilikti atqarýshy organdarmen tyǵyz ózara is-qımyl uıymdastyryldy. Bul áskerlerdiń jabdyqtaý jumysynyń tıimdiligin aıtarlyqtaı arttyrady.
«Batyl toıtarys – 2022» keshendi vedomstvoaralyq strategıalyq komandalyq-shtabtyq oqý-jattyǵý Memleket basshysy Qasym-Jomart Toqaevtyń kúshtik qurylymdar arasyndaǵy tıimdi úılestirýdi qamtamasyz etý, olardyń jedel jáne áskerı-tehnıkalyq úılesimdiligin jolǵa qoıý, sondaı-aq vedomstvoaralyq úılestirýdi kúsheıtý jónindegi tapsyrmalaryn iske asyrý aıasynda ótkiziletinin esterińizge sala keteıik.
