112 júk ólsheý stansıasyn ornatý josparlanyp otyr.
Qazaqstanda kólik quraldarynyń salmaǵy jáne gabarıttik parametrlerin ólsheıtin avtomattandyrylǵan stansıalar ornatylady. Bul týraly QR Parlamenti Májilisiniń plenarlyq otyrysynda Indýstrıa jáne ınfraqurylymdyq damý mınıstri Qaıyrbek Óskenbaev málimdedi, dep habarlaıdy Almaty-akshamy.kz.
Bul qadam úzdiksiz júk tasymaly áserinen jol tóseminiń merziminen buryn buzylýy sıaqty máseleni ońtaıly sheshýge múmkindik bermek. Osy maqsatta 2025 jyldyń sońyna deıin 112 júk ólsheý stansıasyn ornatý josparlanyp otyr.
«Avtomattandyrylǵan stansıalar adamnyń qatysýynsyz «Sergek» júıesiniń qaǵıdaty boıynsha jumys isteıdi. Usynylyp otyrǵan sharalar elimizdegi kólik joldarynyń uzaq merzimde saqtalýyn qamtamasyz etip, kóliktik baqylaý júrgizý kezinde adamı faktordy boldyrmaýǵa yqpalyn tıgizbek», – dep atap ótti QR IIDM basshysy Qaıyrbek Óskenbaev.
Aıta keterligi, Indýstrıa jáne ınfraqurylymdyq damý mınıstrligi Parlamenti Májilisi depýtattarynyń qaraýyna «Qazaqstan Respýblıkasynyń keıbir zańnamalyq aktilerine kólik máseleleri boıynsha ózgerister men tolyqtyrýlar engizý týraly» zań jobasyn usyndy. Atalǵan qujat Qazaqstan Respýblıkasynyń 4 kodeksi men 16 zańyna ózgertýler men tolyqtyrýlar engizýdi kózdeıdi.
Zań jobasy joldarda kóliktik baqylaýdy avtomattandyrý, temirjol jáne sý kólikterinde oryn alǵan oqys oqıǵalar men avarıalyq jaǵdaılardy tergeý tártibin jetildirýdi qarastyrady.
Sonymen qatar zań jobasyna halyqtyń áleýmettik jaǵynan áljýaz toptarynyń qoǵamdyq kólikte júrýine jeńildik beretin normalar da engizilgen. Al birqatar túzetý temirjol jáne sý kólikterindegi qozǵalys qaýipsizdigin arttyrýǵa baǵyttalyp otyr.
«Búginde temirjol kóligindegi apattar men avarıalardy tergeý amaldaryn kólik salasyndaǵy ýákiletti organ, al oqıǵalar men oqys jaıttardy - tasymaldaý prosesine qatysýshylardyń ózderi júrgizedi. Azamattardyń ómiri men densaýlyǵynyń qundylyǵyn eskere otyryp, zań jobasy sheńberinde jolaýshylar poıyzdarynyń joldan shyǵýyn nemese soqtyǵysýyn týdyrǵan oqıǵalardy tekserý ýákiletti organnyń quziretine berý usynylady»,– dedi vedomstvo basshysy.
Halyq qalaýlylarynyń qaraýyna usynylǵan zań jobasy azamattyq avıasıa salasynda da birqatar ózgerister engizýdi kózdeıdi. Atap aıtqanda, pılotsyz ushý apparattaryn paıdalaný prosesin retteý jónindegi norma bar.
Budan ózge zań jobasynda halyqaralyq standarttarǵa sáıkes kezekti aýdıtten sátti ótýge daıyndalýǵa baǵyttalǵan birqatar mańyzdy túzetýler qarastyrylǵan.
Óz kezeginde Májilis depýtattary kólik máseleleri boıynsha ózgerister men tolyqtyrýlar engizýdi kózdeıtin zań jobasyn birinshi oqylymda maquldady.