Qazaqstan Respýblıkasy Prezıdentiniń janyndaǵy Qazaqstannyń strategıalyq zertteýler ınstıtýtynyń tapsyrysy boıynsha «Demokratıa ınstıtýty» ǵylymı-zertteý qory 2024 jyldyń 18 tamyzy men 17 qyrkúıegi aralyǵynda áleýmettanýlyq zertteý júrgizdi. Saýalnamaǵa 18 jastan asqan 8 myń respondent qatysty, dep habarlaıdy aqshamnews.kz
XXI ǵasyrda energetıka ekonomıkalyq turaqtylyqqa, ekologıaǵa jáne halyqtyń ómir súrý sapasyna aıtarlyqtaı yqpal etetin jahandyq damý faktory bolyp tabylady. Qazaqstan ýran qory boıynsha álemde aldyńǵy qatarda bola otyryp, elektr qýaty tapshylyǵyn sheshý maqsatynda atom elektr stansıasyn salýdy qarastyryp otyr.
Saýalnama nátıjeleri boıynsha respondentterdiń 59,2%-y referendýmǵa qatysýǵa daıyn ekenin bildirdi. Onyń 41,6%-y naqty qatysatynyn aıtqan. Sonymen qatar, 20% áli sheshim qabyldamaǵanyn, al 17% referendýmǵa qatyspaıtynyn málimdegen.
AES qurylysyn qoldaýshylardyń sany aıtarlyqtaı ósti: tamyz aıyndaǵy saýalnamada 53,1% qoldaý kórsetse, qyrkúıekke qaraı bul kórsetkish 60,2%-ǵa jetken. Respondentterdiń 24,9%-y AES qurylysyna qarsy ekenin bildirgen. Olar AES-nyń adam densaýlyǵy men qorshaǵan ortaǵa áseri týraly aqparatqa erekshe mán bergen.
Zertteý jeke suhbat (face-to-face) ádisimen júrgizildi. Saýalnamaǵa 17 oblys pen respýblıkalyq mańyzy bar úsh qala – Astana, Almaty, Shymkenttiń 18 jastan asqan turǵyndary qatysty. Jalpy irikteý kólemi 8000 respondentti qurady. Statısıkalyq qatelik 2,9%-dan aspaıdy.
Bul zertteý atom elektr stansıasy qurylysyna qatysty úkimet, sarapshylar men halyq arasyndaǵy ashyq dıalogtyń mańyzdylyǵyn kórsetip otyr.