Qazaqstanda áskerı qyzmetkerlerdiń azyq-túlik paıkasynyń quny qaıta qaralady
Bul týraly premer-mınıstr Oljas Bektenov depýtattyq saýalǵa bergen resmı jaýabynda málimdedi, dep habarlaıdy aqshamnews.kz.
Onyń aıtýynsha, qazirgi tańda bul másele Qorǵanys mınıstrligi janynan qurylǵan arnaıy jumys tobynyń qaraýynda tur. Top quramyna Qarjy mınıstrligi, İshki ister mınıstrligi, Tótenshe jaǵdaılar mınıstrligi, Ulttyq qaýipsizdik komıteti, Memlekettik kúzet qyzmeti jáne "Atameken" ulttyq kásipkerler palatasynyń ókilderi engen.
Jumys toby 2023–2024 jyldardaǵy statısıkalyq málimetterdi eskere otyryp, azyq-túlik paıkasynyń qazirgi qunyn qaıta eseptep jatyr. Sonymen qatar, paıkany esepteý ádistemesin jetildirý boıynsha biryńǵaı ustanymdardy ázirleý de kún tártibinde tur. «Onyń ishinde áskerdiń óz-ózin azyq-túlikpen qamtamasyz etýge kóshý múmkindigi de qarastyrylyp jatyr», – delingen premer-mınıstrdiń jaýabynda.
Budan bólek, azyq-túlik qunynyń ınflásıa men naryqtaǵy baǵa ózgeristerine sáıkestigin qamtamasyz etý maqsatynda turaqty túrde túzetip otyrý tetigi engizilýi múmkin. Bul rette, azyq-túlik sapasy men jetkizilý barysyn qoǵamdyq uıymdardyń tarapynan baqylaý tetikteri de qarastyrylyp jatqany atap ótildi.
Aıta keteıik, buǵan deıin bir sarbazdy táýligine tamaqtandyrýǵa 2 225 teńge bólinetini habarlanǵan bolatyn. Bul kórsetkish qazirgi ekonomıkalyq jaǵdaı men naryqtaǵy baǵa ósimi aıasynda qaıta qaralýy áskerdiń áleýmettik jaǵdaıyn jaqsartýǵa baǵyttalǵan mańyzdy qadam bolmaq.