Qazaqstanda ata-analardyń shamamen 14 paıyzy jumysbastylyqtyń kesirinen balalaryna jetkilikti kóńil bóle almaıdy.
Bul derek Balalardyń ál-aýqaty ındeksi boıynsha júrgizilgen aýqymdy áleýmettik zertteý nátıjesinde belgili boldy, - dep habarlaıdy Aqshamnews.kz.
Zertteýge 93 myńnan astam adam qatysqan, onyń 52 myńnan astamy – ata-analar, qalǵany – oqýshylar. Nátıjesinde ata-analardyń 13,9 paıyzy balasyna ýaqyt tappaı júrgenin moıyndaǵan.
Eń joǵary kórsetkishter tirkelgen óńirler:
-
Soltústik Qazaqstan oblysy – 17,9%,
-
Almaty qalasy – 17,8%,
-
Qostanaı oblysy – 17,3%,
-
Aqmola oblysy – 16,1%.
Al eń tómen úles Shyǵys Qazaqstan (9,1%), Batys Qazaqstan (10%) jáne Atyraý (10,6%) oblystarynda baıqalǵan.
«Ata-ananyń turaqty nazary men qoldaýy – balanyń emosıalyq turaqtylyǵy men jan tynyshtyǵynyń basty kepili. Al úlkenderdiń jumysbastylyǵy senimdi álsiretip, otbasyndaǵy baılanysty úzip jiberedi», – deıdi Balalardyń quqyqtaryn qorǵaý komıtetiniń tóraǵasy Nasymjan Ospanova.
Onyń aıtýynsha, «Adal Azamat» baǵdarlamasy aıasynda ata-analarǵa qoldaý kórsetý ortalyqtary jumys istep jatyr. Jańartylǵan baǵdarlama sheńberinde bul ortalyqtar endi balalardyń psıhıkalyq saýlyǵy men emosıalyq damýyna arnalǵan zamanaýı ádisterdi qamtıtyn bolady.
UNICEF zertteýlerine sáıkes, ata-ananyń balamen kún saıyn bar bolǵany 10–15 mınýt esh alańsyz sóılesýi:
-
mazasyzdyqty azaıtady,
-
ózara senimdi nyǵaıtady,
-
balanyń emosıonaldyq turaqtylyǵyn arttyrady.
Komıtet mamandary ata-analarǵa:
-
kún saıyn eń kemi 5 mınýt balamen smartfonsyz, gadjetsiz ashyq sóılesýge,
-
balanyń jaǵdaıyna muqıat bolýǵa
keńes beredi.
Eger balada tuıyqtyq, ashýshańdyq nemese alańdaýshylyq belgileri baıqalsa, ata-analar:
-
mektep psıhologyna,
-
Psıhologıalyq qoldaý ortalyqtaryna,
-
«111» baılanys ortalyǵyna
júginýlerine bolady.