Jyl saıyn elimizde 36-37 myń adamnan qaterli isik anyqtalady.
Qazaqstanda alǵash ret qaterli isikke shaldyqqan balalardyń súıek kemigin transplantasıalaý úshin deneniń tolyq sáýlelenýiniń sońǵy tehnıkasy qoldanyla bastady, dep habarlaıdy Almaty-akshamy.kz.
Astanada «UMIT» halyqaralyq onkologıalyq tomoterapıa ortalyǵy men Ulttyq ana men bala ortalyǵynyń onkologtary sheteldik mamandarmen birlesip, onkologıalyq aýrýlardy emdeýdegi sońǵy ádistemeni – «Total Body Irradiation»(TBI) qoldaný boıynsha oqytý sheberlik sabaǵyn ótkizgen bolatyn. Súıek kemigin transplantasıalaýdy qajet etetin naýqas qyzdy mysalǵa ala otyryp, UMIT Halyqaralyq onkologıalyq ortalyq mamandary reseılik onkologtar jáne Ana men bala ulttyq ortalyǵynyń dárigerlerimen birlesip, deneni jalpy sáýlelendirýdiń biregeı ádisin qoldandy.
«12 jastaǵy Káýsarǵa qaterli isik aýrýyn emdeý úshin súıek kemigin aýystyrý kerek. Ol buǵan deıin Túrkıada em qabyldaǵan. Biraq, donor tabylmaı elge kelgen. Endi Elordadaǵy ortalyqta naýqastyń búkil denesin tolyq sáýlelendirý arqyly emdeý júrgizildi. Bul onkologıalyq naýqasty súıek kemigin transplantasıalaýǵa daıyndaýdaǵy qajetti qadam. Buryn bul prosedýra Qazaqstanda eshqashan qoldanylmaǵan», - delingen baspasóz baıanynda.
Jalpy TBI tehnologıasy sáýlelendirýdi naqty aımaqtardaǵy isikti joıý úshin qoldanylmaıdy, búkil deneni súıek kemigin transplantasıaǵa daıyndaýǵa arnalǵan. Transplantasıalanǵan súıek kemiginiń negizinde adam aǵzasy aýrý-syrqaýsyz óziniń ári qaraı ómir súrýin jáne qalpyna kelýin jalǵastyrady.
«Bul Qazaqstannyń búkil densaýlyq saqtaý salasynyń jetistigi ekeni sózsiz. Óıtkeni, búgingi kúnge deıin birde-bir onkologıalyq dıspanserde leıkozdyń mıeloıdty leıkoz, lımfoblastıkalyq leıkoz sıaqty túrlerimen aýyratyn naýqastarǵa súıek kemigin transplantasıalaý arqyly emdeý kezinde deneni tolyq sáýlelendirý júrgizilmegen», - deıdi «UMIT» Halyqaralyq onkologıalyq tomoterapıa ortalyǵynyń dırektory Erjan Shaıahmetov.
Jyl saıyn elimizde 36-37 myń qaterli isikke shaldyqqan naýqas anyqtalatynyn eskersek, bolashaqta bul jańa tásildiń Ult saýlyǵyn saqtaýda berer kómegi zor deıdi sala mamandary.
Resmı málimet boıynsha, Qazaqstanda qan túzý jáne lımfa júıesiniń onkologıalyq aýrýlarymen aýyratyn 9 myńnan astam naýqas bar. Ári jyl saıyn 1500-ge deıin jańa naýqastar tirkeledi, onyń ishinde 232 jaǵdaı (2021 jyldyń derekteri boıynsha) jedel leıkozben aýyratyn balalar. Jedel lımfoblastıkalyq leıkozben aýyratyn balalardyń 5 jyldyq jalpy ómir súrý deńgeıi byltyr (2021 jyldyń kórsetkishi) shamamen 72% quraǵan.