5G tehnologıasyn engizý 2030 jyly álemdik JİÓ-niń 610 mıllıard dollardan asýyna ákeledi
Qazaqstanda baılanys operatorlary arasynda alǵash ret jıilikterdi bólý boıynsha elektrondy saýda-sattyq bastaldy. Aýksıon uıaly baılanystyń besinshi býynyn (5G) engizý men jıilik dıapazondaryn bólýdi kózdeıdi, dep habarlaıdy Almaty-akshamy.kz.
Báseke qalyptastyrý maqsatynda aýksıonǵa radıojıilikterdi bólý tártibimen bekitilgen talaptarǵa saı keletin kompanıalar qatysa alady. Bul aýksıon 5G tehnologıalary úshin radıojıilik taratýdyń ashyq mehanızmin kórsetedi.
«Búgingi tańda tehnologıalar qarqyndy damyp keledi. Sondyqtan túrli ekojúıelerdi, qosymshalardy, qyzmetterdi júıelendirý úshin sapaly ınfraqurylym qalyptastyrýymyz qajet. Árıne 5G tehnologıasyn damytý úshin birneshe jyldar qajet. Alaıda, osy ýaqyt ishinde trafıkter edáýir úlken kólemde damyp, jańa qyzmetter paıda bolady. Búgin biz azamattarymyzǵa sapaly zamanaýı servısterdi usyný úshin, jańa uıaly baılanys júıesin engizýdi kózdep otyrmyz», - deıdi QR Sıfrlyq damý vıse-mınıstri Asqat Orazbek.
Aýksıon sharttary boıynsha qatysýshyda – keminde alty oblysty, respýblıkalyq mańyzy bar qalalardy qamtıtyn telekommýnıkalıalar men uıaly baılanystyń magıstraldyq jelileri jáne memlekettik lısenzıasy bolýy tıis. Sondaı-aq, negizgi sharttarǵa sáıkes, qatysýshy kompanıa taratý nemese bankrotqa ushyraý satysynda bolmaýy kerek. Oǵan qosa, kepildik jarnany tólegeni týraly qujattardy usynýy qajet.
GSMA Intelligence halyqaralyq uıymynyń jahandyq jáne óńirlik zertteýi 2030 jylǵa qaraı 5G tehnologıalary jalpy ishki ónimge jáne áleýmettik-ekonomıkalyq jaǵdaıǵa oń áserin tıgizetinin baǵalaǵan.
Sonymen qatar, halyqaralyq taldaý negizinde 5G tehnologıasyn engizý 2030 jyly álemdik JİÓ-niń 610 mıllıard dollardan asýyna ákeledi. Bul 5G tehnologıasynyń jalpy áleýmettik-ekonomıkalyq áseriniń 65% quraıdy.
5G tehnologıalary men qyzmetteriniń áleýmettik-ekonomıkalyq áserinen bólek, densaýlyq saqtaý men bilimge qoljetimdilikti jaqsartý, qoǵamdyq qaýipsizdikti arttyrý jáne qorshaǵan ortanyń lastanýyn azaıtý sıaqty qosymsha artyqshylyqtary kútilýde.
Joǵaryda atalǵan zertteý boıynsha TMD elderinde 5G-di qoldanysqa engizý arqyly JİÓ-niń 14 mıllıard dollarǵa ósýi boljanyp otyr, onyń ishinde Qazaqstannyń úlesi 12%-dy quraıdy.
Sonymen qatar, kóptegen damyǵan elderde 5G jıilikterin satý aýksıondarynda qomaqty qarajat bólingenin atap ótken jón. Mysaly, Shveısarıada - $378 mln, Italıada - €6,5 mlrd, Ispanıada - €437,6 mln, Avstrıada - €188 mln, Ulybrıtanıada – £1,35 mlrd, Germanıada - €6.5 mlrd, Ońtústik Koreıada- $3,3 mlrd.