Barlyǵy 12 myńnan astam sottalǵanǵa raqymshylyq jasalady
Qazaqstanda 5 myńnan astam sottalǵanǵa raqymshylyq jasaldy, dep habarlaıdy Almaty-akshamy.kz İİM Qylmystyq-atqarý júıesi komıtetiniń baspasóz qyzmetine silteme jasap.
Komıtettiń málimetinshe, barlyǵy 12 myńnan astam sottalǵanǵa raqymshylyq jasalady.
Qazirgi ýaqytta elimizdiń qylmystyq-atqarý júıesi mekemelerinde 34 myńnan astam ustalady. «Qazaqstan Respýblıkasy Táýelsizdiginiń otyz jyldyǵyna baılanysty raqymshylyq jasaý týraly» zańǵa qol qoıylǵan kúnnen bastap bas bostandyǵynan aıyrý oryndaryndaǵy 945 adam jazadan bosatyldy, taǵy 1 102 sottalǵanǵa jazanyń ótelmegen merzimderin qysqartty.
"Sottyń sheshimi jarıalaǵannan keıin sottalǵandar dereý bosatylýǵa jatady. Buǵan deıin ótken raqymshylyqtar qaýlynyń zańdy kúshine enýin kútýdi kózdeıtin jáne sottalǵandar 15 kún ótkennen keıin ǵana penıtensıarlyq mekemelerden bosatylýy múmkin bolatyn. Bul izgilik aktisi qoǵamnan oqshaýlaýsyz qylmystyq jazaǵa tartylǵan adamdarǵa da qoldanylady", - delingen habarlamada.
Jazadan bosatylǵan probasıa qyzmetiniń esebinde turǵandardyń sany búginde 1 741 azamatty quraıdy. Sottar jazanyń ótelmegen merzimin qysqartý týraly sheshimdi 1,7 myń esepke alynǵan adamǵa qatysty qabyldady.
Esterińizge sala keteıik, raqymshylyq aktisi qylmystyq-quqyqtyq qatynastardyń belgili bir aspektilerine ǵana qatysty. Ol azamattardy ońaltýǵa emes, tek qylmys jasaǵan adamdardyń jaǵdaıyn jeńildetýge baǵyttalǵan.
Raqymshylyq jazadan tolyq nemese ishinara bosatýdan, neǵurlym jeńilge aýystyrýdan nemese qylmystyq qýdalaýdy toqtatýdan turady.
Aıta ketý kerek, ol azamattar men memlekettiń qaýipsizdigine eleýli qater tóndirmeıtin qylmys jasaǵan adamdarǵa qoldanylady, áleýmettik osal toptarǵa – kámeletke tolmaǵandarǵa, áıelder men egde jastaǵy er kisilerge, múgedektigi bar adamdarǵa (1 jáne 2-toptar) erekshe kóńil bólinedi.
Byltyrdan bastap QAJ bólinisteri sotqa 11 myńnan astam materıal jiberdi: mekemelerden – 2 310, probasıa qyzmetinen – 9 321 materıal joldandy.