QR Premer-Mınıstri Álıhan Smaıylovtyń tóraǵalyǵymen ótken Investısıalyq ahýaldy jaqsartý jónindegi keńestiń kezekti otyrysynda Qazaqstannyń densaýlyq saqtaý salasyn odan ári damytý máseleleri talqylandy, dep habarlaıdy almaty-akshamy.kz
İs-sharaǵa Ulybrıtanıanyń Qazaqstan Respýblıkasyndaǵy Elshisi Ketı Lıch, Kanada Elshisi Alan Hemson, AQSH Elshisi Denıel Rozenblúm, Dúnıejúzilik bank pen Sıtıbanktiń Qazaqstan boıynsha ókilderi, Ernst & Young, AstraZeneca, Janssen jáne Pfizer kompanıalarynyń ókilderi, sondaı-aq Qazaqstan Respýblıkasynyń ortalyq memlekettik organdarynyń basshylary qatysty.
Jıynǵa qatysýshylar zamanaýı medısınalyq tehnologıalardy engizý, densaýlyq saqtaý ınfraqurylymyn jańǵyrtý, bilikti mamandar daıarlaý, farmasevtıka salasyn damytý, halyqtyń ınovasıalyq dári-dármekterge qoljetimdiligin arttyrý, shalǵaıdaǵy eldi mekenderdiń turǵyndaryna medısınalyq qyzmet kórsetý jáne basqa da birqatar máseleni jan-jaqty talqylady.
Premer-Mınıstr sońǵy jyldary Qazaqstanda densaýlyq saqtaý salasynda aýqymdy reforma júrgizilip jatqanyn atap ótti. Atap aıtqanda, Biryńǵaı ulttyq densaýlyq saqtaý júıesi quryldy, mindetti medısınalyq saqtandyrý engizildi, telemedısına damyp keledi, qural-jabdyqtar men dári-dármekter satyp alý prosesi jaqsardy, dárigerlerdiń jalaqysy edáýir artty.
«Jalpy, Úkimet 2027 jylǵa qaraı medısına salasyn qarjylandyrý deńgeıin JİÓ-niń 5%-na deıin jetkize otyryp, atalǵan salany damytýdyń turaqty modelin qurý boıynsha jumys júrgizip jatyr. Osyǵan oraı biz ınvestısıalar men ozyq tehnologıalar tartýǵa múddelimiz», — dedi Álıhan Smaıylov.
Ol Úkimet qabyldap jatqan sharalar salanyń ınvestısıalyq tartymdylyǵyna oń áserin tıgizetinin aıtty. Máselen, ótken jyldyń qorytyndysyna sáıkes densaýlyq saqtaý salasyndaǵy negizgi kapıtalǵa salynǵan ınvestısıa kólemi shamamen $540 mln-dy qurap, 30%-ǵa ósti. Sonymen qatar sońǵy 7 jylda farmasevtıka naryǵynyń kólemi 2,9 esege artty.
Onyń aıtýynsha, medısına ınfraqurylymyn jaqsartý boıynsha keshendi sharalar qabyldanyp keledi. Máselen, QR Prezıdentiniń tapsyrmasy boıynsha jeke ınvestısıalar tartý arqyly 20 zamanaýı kópbeıindi aýrýhana salý josparlanyp otyr. Sondaı-aq «Aýyldyq densaýlyq saqtaýdy jańǵyrtý» ulttyq jobasy aıasynda 655 alǵashqy medısınalyq-sanıtarıalyq kómek kórsetý nysany paıdalanýǵa berilip, 32 kópbeıindi aýdandyq aýrýhana jańǵyrtylady.
Premer-Mınıstr Úkimet memlekettik qoldaý sharalarynyń paketterin usyna otyryp, farmasevtıkalyq ındýstrıanyń álemdik iri ókilderimen de belsendi iskerlik baılanystardy arttyratynyn atap ótti. Osylaısha, Pfizer kompanıasymen Dári-dármek óndirisin lokalızasıalaý boıynsha ınvestısıalyq kelisim jasaý josparlanyp otyr. AstraZeneca kompanıasymen ınvestısıa kólemi $32 mln bolatyn biregeı dárilik zattardyń kelisimsharttyq óndirisin qurý týraly ýaǵdalastyqqa qol jetkizildi.
Sonymen birge QR Prezıdentiniń AQSH-qa sapary barysynda GE Healthcare kompanıasymen quny $60 mln bolatyn medısınalyq tehnıka óndirisin lokalızasıalaý jónindegi negizdemelik kelisimge qol qoıyldy. Sondaı-aq Roche kompanıasymen $2,5 mln somaǵa birqatar joba pysyqtalyp jatyr. Ońtústik Koreıa, Túrkıa, Egıpet jáne Izraıl ınvestorlarymen kelisim-sharttyq óndiris jobalary júzege asyrylýda.
«Dárilik zattarǵa suranystyń artýy aıasynda densaýlyq saqtaý salasynyń, onyń ishinde farmasevtıka ónerkásibiniń damý áleýeti óte zor», — dep atap ótti Álıhan Smaıylov.
Jıyndy qorytyndylaı kele Premer-Mınıstr ýákiletti memlekettik organdarǵa keńes barysynda aıtylǵan usynystar men usynymdar boıynsha jumysty pysyqtaýdy tapsyrdy.